„Гордана Димитриеска Кочоска да си поднесе оставка, лаже за Алта банка“, вели Филипче

Претседателот на СДСМ, Венко Филипче, побара оставка од министерката за финансии Гордана Димитриеска-Кочоска, обвинувајќи ја дека не ја кажува вистината за случајот со Алта банка. Тој побара Јавното обвинителство да отвори истрага и за премиерот Христијан Мицкоски и за министерката, а во проверката да се вклучи и Европското обвинителство.

— реклама —

Филипче тврди дека Владата била запознаена со понудата на „Алта банка“ АД Белград за преземање акции од 16 јавни институции, посочувајќи дека на седницата одржана на 23 септември 2025 година биле донесени заклучоци на предлог на Димитриеска-Кочоска.

Како доказ, тој посочи на записникот од владината седница, во кој, според неговите наводи, институциите биле задолжени да достават писмена изјава за прифаќање или одбивање на понудата на „Алта банка“.

— реклама —

Филипче постави прашање дали тоа значи дека претставници на Владата биле во директна комуникација со сопственикот на банката, Давор Мацура, и дали со таквите постапки му било овозможено да стекне поголем пакет акции на сметка на државата.

— реклама —

Тој побара да се испита текот на сите пари поврзани со случајот и најави дека за одговорност треба да се утврдат сите околности. Наводите и обвинувањата ги изнесе Филипче, а за нивната основаност треба да се произнесат надлежните институции.

— реклама —