Горивата може повторно да поевтинат, Мицкоски уверува дека има доволно залихи до Нова година

Премиерот Христијан Мицкоски очекува намалување на цените на дизелот и бензинот следната недела, а Владата преговара и со „Окта“ за дополнителен попуст на нафтените деривати. Истовремено, поради намалените приходи од акцизи и ДДВ за горивата, во текот на октомври се очекува уште еден ребаланс на Буџетот.

Мицкоски, при увидот на градежните работи на мостот „Љубљанска“ во Скопје, изјави дека Владата ги следи движењата на светските берзи и дека според анализите од изминатата недела очекува ново намалување на цените.

„Очекувам, според анализата на берзите како се движеа минатата недела, да имаме поевтинување на дизелот и бензинот следната недела, бидејќи тоа во Владата го анализираме и го следиме, но тоа ќе си го каже Регулаторната комисија за енергетика“, рече Мицкоски.

— реклама —

Конечната одлука за максималните малопродажни цени треба да ја донесе Регулаторната комисија за енергетика.

Паралелно со очекуваното поевтинување, Владата преговара со „Окта“ за дополнителен попуст при снабдувањето со нафтени деривати.

„Преговараме со најголемиот снабдувач на нафта и нафтени деривати, пред сè мислам на дизел гориво и безоловни горива, ‘Окта’, за дополнителен попуст, со што ќе бидеме убедливо држава со најниска цена на горивото во регионот, а можеби и најниска во Европа“, изјави премиерот.

— реклама —

Мицкоски тврди дека мерките за одржување пониски цени на горивата придонесуваат за заштита на стандардот на граѓаните и за контролирање на инфлацијата, но истовремено создаваат значителен недостиг на приходи во државната каса.

Според неговите проценки, само по основ на акциза во Буџетот ќе недостигаат околу пет милијарди денари. Кога на тоа ќе се додадат намалените приходи од ДДВ, особено поради намалената стапка за дизелот, вкупниот износ може да достигне меѓу седум и осум милијарди денари.

„Тоа не може да биде покриено со прераспределба, ќе мора формално да се направи таков ребаланс“, рече Мицкоски, најавувајќи дека постапката се очекува во текот на октомври.

— реклама —

Според него, Владата и покрај намалените приходи ќе продолжи со мерките чија цел е заштита на животниот стандард, а евентуалниот ребаланс не мора да значи зголемување на буџетскиот дефицит бидејќи може да следува намалување и на приходната и на расходната страна.

Мицкоски истовремено оцени дека земјата е енергетски стабилна и подготвена за претстојната грејна сезона. Според него, ремонтите на термоблоковите во РЕК „Битола“ и „Осломеј“ се во завршна фаза или треба да завршат до крајот на месецот.

Хидропотенцијалот во моментов, како што рече, е на околу 40 проценти од капацитетот, а очекува есенските и зимските врнежи да придонесат следната сезона за наводнување да биде пречекана со ниво од 80 до 85 проценти.

— реклама —

Премиерот уверува и дека во моментов нема проблем со залихите на нафта и нафтени деривати и дека договорите со снабдувачите се обезбедени најмалку до Нова година.

Како еден од главните предизвици во претстојната грејна сезона го посочи загадувањето на воздухот, предизвикано и од користењето нееколошки горива за затоплување. За системот за парно греење во Скопје, Мицкоски рече дека по летните санации на мрежата се очекува значително намалување на загубите на вода.

Во однос на можноста за проширување на периодот во кој домаќинствата можат да користат евтина тарифа за електрична енергија, премиерот рече дека позитивно би ја поздравил секоја реформа што ќе биде во корист на граѓаните.