Гостиварчанецот Дарко Грујоски на социјалните мрежи објави микробиолошки наод, тврдејќи дека кај него биле пронајдени јајца од цревниот паразит Ascaris lumbricoides, по што побара одговорност за загадувањето на водата во градот.
Во објавата, Грујоски наведува дека паразитот се пренесува по фекално-орален пат, преку загадена вода, загадена храна или нечисти раце, а според препорака од лекар, треба да се испитаат и најблиските членови на неговото семејство поради можноста за повторно пренесување.
„Кај мене се пронајдени јајца од цревен паразит – Ascaris lumbricoides. По препорака од лекар, поради лесното пренесување, треба да се испитаат и најблиските членови на семејството, бидејќи ако има уште заразени, може повторно да се пренесува“, напиша Грујоски.
Тој наведува дека во изминатиот период поминал низ лекарски прегледи, анализи, лекување, изгубени работни денови и стрес.
Осврнувајќи се на официјално потврденото загадување на водата во Гостивар, Грујоски поставува прашање за одговорноста на локалните власти.
„Во услови кога официјално беше утврдено загадување на водата, прашувам: Дали градоначалникот чувствува морална одговорност? Кој ќе ги плати прегледите? Кој ќе ги плати анализите? Кој ќе ги плати лековите? Кој ќе им го врати здравјето и мирот на луѓето што поминаа низ ова?“, наведува тој.
На крајот од објавата порачува:
„Не барам изговори. Не барам прес-конференции. Барам одговорност.“
Во прилог на објавата, Грујоски сподели фотографија од лабораториски наод, во кој е наведено дека при микроскопски преглед на фецес се пронајдени јајца од цревниот паразит Ascaris lumbricoides.
