Ерлинг Халанд, еден од најдобрите фудбалери на денешницата, откри како изгледа неговата совршена романтична вечер со девојката Изабел Хаугсенг Јохансен. Наместо луксузни ресторани и егзотични патувања, норвешкиот напаѓач признава дека најмногу ужива во едноставните моменти.
„Јас ја подготвувам вечерата. Веројатно ќе ѝ биде малку непријатно што го кажувам ова, но таа сака да игра видеоигри. Заедно играме Мајнкрафт. Седиме, играме и градиме куќи. Или се враќаме во Брине и нарачуваме ќебап“, изјави Халанд.
Двајцата се во врска од 2021 година, но се познаваат уште од детството. Израснале во норвешкиот град Брине и како тинејџери биле дел од локалниот фудбалски клуб Брине ФК.
Иако долго време биле пријатели, нивната љубовна врска започнала дури откако Халанд се преселил во Германија за да игра за Борусија Дортмунд.
„Таа прва ми испрати порака. Игравме во истиот клуб. Таа прва ме забележа мене, а не јас неа“, откри фудбалерот.
Во декември 2024 година парот го доби своето прво дете, но приватниот живот го чува далеку од очите на јавноста. Сѐ уште не го откриле името на синот ниту објавиле негови фотографии.
Изабел, покрај тоа што е партнерка на Халанд, гради и успешна кариера како модел и инфлуенсерка, но нагласува дека сака јасно да ја одвои приватноста од јавниот живот.
„Сакам да го заштитам моето семејство, но истовремено сакам луѓето подобро да ме запознаат. Најголемиот предизвик е да се постави граница меѓу она што е приватно и она што може да се сподели со јавноста“, изјави таа за норвешкото списание „КК“.
