Проверката на багажот на двајца странски државјани на аеродром во Црна Гора резултирала со нивно апсење, откако полицијата пронашла специјализирана опрема која може да се користи за надзор и откривање уреди за прислушување.
Уапсените, 31-годишниот руски државјанин Александар Михаиловиќ Кругљански и 42-годишната израелска државјанка Александра Кругљанска, се обидувале да се качат на лет за Тел Авив. Со себе носеле вкупно 19 куфери и торби.
При деталниот преглед, во повеќе од половина од багажот биле откриени различни технички уреди. Меѓу нив имало GPS-тракер со интегриран микрофон, професионален детектор на радио-сигнали BugHunter Professional BH-04, опрема за видеонадзор, компјутерски компоненти, мемориски уреди и кабли.
Детекторот, според информациите, е наменет за откривање скриени безжични микрофони и камери, поради што надлежните се сомневаат дека дел од опремата можела да биде наменета за надзор или шпионажа.
Освен техничката опрема, кај двајцата биле пронајдени и непријавени лекови, 26.210 евра и 1.150 израелски шекели.
Според „Вијести“, двајцата во Црна Гора престојувале со туристичка виза и во претходниот период повеќепати влегувале во земјата.
По налог на државниот обвинител од Основното државно обвинителство во Котор, против нив е поднесена кривична пријава поради сомнение за шверц и перење пари.
Случајот продолжува да се истражува, а црногорската полиција соработува со Агенцијата за национална безбедност и меѓународни разузнавачки партнери за да се утврдат мотивите и целосната позадина на нивните активности.
