Садик Кан се соочи со критики откако блокираше договор вреден 50 милиони фунти меѓу Метрополитен полицијата и американската технолошка компанија Palantir Technologies.
Преку договорот, лондонската полиција планирала да користи вештачка интелигенција за побрзо водење криминалистички истраги, но од кабинетот на градоначалникот постапката беше стопирана.
Извршниот директор на Палантир за Велика Британија, Луис Мозли, остро реагираше на одлуката, оценувајќи дека таа ќе им оди во прилог на криминалците и на непријателските држави.
„Ако на Метрополитен полицијата не ѝ се дозволи да го користи овој софтвер, тоа значи дека нема да може да распореди повеќе полицајци на терен“, изјави Мозли.
Тој го обвини Кан дека „ја става политиката пред јавната безбедност“.
Од друга страна, од Канцеларијата на градоначалникот за полиција и криминал соопштија дека постапката за набавка била проблематична, бидејќи Палантир бил единствениот сериозно разгледуван понудувач, а полицијата не ја доставила стратегијата за набавка на одобрување.
Дополнителна причина за блокирањето биле и високите трошоци на договорот, кои, според градските власти, можеле да создадат „неприфатлив“ притисок врз буџетот.
Компанијата Палантир, основана од милијардерот Питер Тил, веќе соработува со повеќе британски институции, но во минатото беше критикувана поради прашања поврзани со надзор и приватност.
