Ана Петровска, кандидатот за градоначалник на Град Скопје од „Зелен хуман град“ смета дека градот има обврска да им обезбеди непречено движење на лицата со хендикеп.
„Во пријателска атмосфера остварив средба со Звонко Шаврески, претседател на Полио Плус, организација – членка на граѓанската коалиција Зелен хуман град. Услугите што ги дава Градот треба да бидат достапни за сите, вклучително и за ранливите категории. Проблемите со пристапност на лицата со хендикеп почнуваат со првиот чекор надвор од домот.
Заедно заклучивме дека и покрај толку донесени закони, нема доволно свест кај надлежните. За одредени решенија на проблемите со кои се соочуваат лицата со хендикеп дури и не се потребни дополнителни финансиски средства, туку само добра волја за подобрување на нештата. Обележани паркинг места, пристап до домовите и јавните објекти, издигната зебра, звучен семафор, тактилна патека се само дел од потребите кои овие граѓани ги имаат. За непрописно паркирање на места обележани за лица со хендикеп треба да има опомена и казна, но исто така, може да се воведе и општокорисна работа како алатка за едукација. Одговорно раководство на Градот ќе ги дефинира приоритетите за да обезбеди непречено движење на лицата со хендикеп, но и за пристап до сервисите на локалната самоуправа. Затоа што секој човек има право на пристап, право на слободно и непречено движење и можност за нормален живот“, напиша Петровска.
