Пратеникот на СДСМ, Фатмир Битиќи, денеска на прес-конференција во Собранието оцени дека новото задолжување на Владата од 260 милиони евра ќе претставува сериозен финансиски товар за граѓаните поради високите каматни стапки.
Според Битиќи, врз основа на актуелниот шестмесечен ЕУРИБОР од 2,562 проценти и договорената маржа од 2,10 процентни поени, заемот во моментов би чинел околу 4,66 проценти годишно.
Тој посочи дека, зависно од распоредот на отплата, државата би платила меѓу 58 и 64 милиони евра само за камати, а заедно со еднократниот надоместок од 3,64 милиони евра, вкупниот директен финансиски товар би се движел од 61 до 67 милиони евра, без дополнителните трошоци.
„Ова е реалната цена што граѓаните ќе ја платат уште пред да почувствуваат било каков економски ефект“, изјави Битиќи.
Тој обвини дека средствата од новото задолжување нема да бидат насочени кон подобрување на животниот стандард, туку, како што рече, за „партиски тендери, омилени фирми и луксузирање на власта“.
Битиќи додаде дека за две години владата предводена од Христијан Мицкоски создала нов долг од 2,5 милијарди евра, додека јавниот долг достигнал, како што наведе, рекордни 11 милијарди евра.
Од СДСМ најавија дека ќе се спротивстават на новото задолжување на Владата.
