Граѓаните се караат за 140 денари, а оние со најголеми плати велат дека нема пари - ние се бориме за преживување а тие за привилегиите, вели Ходаи

„Како дојдовме до тоа обичните граѓани да се караат меѓу себе за 140 денари студентски оброк, додека оние со најголемите плати и привилегии ни објаснуваат дека нема пари?“, прашува Бленди Ходаи, кој повторно се огласи во јавноста по бројните реакции што ги предизвика неговото отворање на прашањето за студентскиот оброк.

Ходаи вели дека во изминатите денови добил стотици пораки и коментари, меѓу кои имало поддршка, критики и навреди, но и реакции што го натерале да размислува за состојбата во општеството.

— реклама —

„Не очекував дека 140 денари студентски оброк ќе отворат толку голема дискусија за тоа во каква држава живееме. Изминативе денови добив стотици пораки и коментари. Некои ме насмеаја, некои ме налутија, а некои искрено ме растажија“, напиша Ходаи.

Тој им се заблагодари и на оние што го поддржале и на оние што го навредувале, оценувајќи дека барем се отворила дискусија за проблем за кој предолго се молчело.

Според него, суштинскиот проблем не е само висината на студентскиот оброк, туку начинот на кој граѓаните се поделени додека одговорните за носење одлуки ги задржуваат своите привилегии.

— реклама —

„Ние се бориме да преживееме, додека тие се борат да си ги зачуваат привилегиите. А ние, наместо да бараме одговорност од нив, се караме меѓу себе“, порача Ходаи.

Тој нагласи дека барањата на студентите не треба да се толкуваат како барање милостина, туку како инсистирање институциите да ги исполнуваат своите обврски.

— реклама —

„И да бидеме јасни, не бараме милостина. Бараме институциите да ги почитуваат сопствените закони и граѓаните на кои треба да им служат. Ова никогаш не било само за студентскиот оброк, туку за достоинството на сите нас“, истакна тој.

Ходаи повика граѓаните да престанат меѓусебно да се напаѓаат поради различните ставови и да ја насочат енергијата кон барање одговорност од носителите на одлуки.

„Не мора да се согласувате со мене, ниту да ме сакате. Но имаме многу повеќе заеднички маки отколку причини да се мразиме. Замислете само колку работи би можеле да промениме ако енергијата што ја трошиме напаѓајќи се меѓу себе ја насочиме кон оние што одлучуваат за нашите животи“, напиша Ходаи.

— реклама —

На крајот, тој порача дека и покрај разочарувањата, сè уште верува во можноста за промени.

„Јас сè уште верувам дека оваа држава убава пак ќе никне. Не затоа што некој од горе ќе ни ја среди, туку затоа што сè уште има луѓе што не се откажуваат од неа“, порача Ходаи, заблагодарувајќи им се на граѓаните за поддршката.