Македонските универзитети со години немаат амбиција да се натпреваруваат со најдобрите во светот, туку главно се споредуваат меѓу себе, оценува Бленди Ходаи, студент на Филозофскиот факултет, граѓански активист и директор на Форумот за образовни промени.
Неговата реакција следува откако ниту еден македонски универзитет не се најде меѓу најдобрите 1.000 на Шангајската листа.
„Навистина очекувавте дека на Шангајската листа на топ 1.000 универзитети ќе се најде некој од нашите универзитети? Па, ние не сме ниту меѓу топ 2.000 универзитети во светот.“
Ходаи смета дека проблемот е подлабок од едно конкретно рангирање и дека домашното високо образование со години функционира во затворен круг, без вистинска споредба со меѓународната конкуренција.
„Нашите универзитети со години се споредуваат само меѓу себе, во систем во кој амбицијата не е да се натпреваруваш со најдобрите, туку да бидеш малку подобар од соседот.“
Според него, токму таквиот пристап ја отсликува состојбата во која се наоѓа високото образование во земјава.
„И така функционираме по старата максима: подобро прв во село, отколку последен во град.“
