Граѓанка го ослободила од каишите и му дала вода, институциите го одзеле – спасен коњот во Кавадарци

Коњот кој во тешка состојба се струполи на улица во Кавадарци, а за кој активистите за заштита на животните алармираа дека бил изложен на малтретирање, е одземен од сопствениците и заштитен од натамошно насилство. Информацијата ја соопшти градоначалникот на Кавадарци, Митко Јанчев, откако случајот предизвика бурни реакции во јавноста.

„Спасен коњот во Кавадарци – хуманоста се покажува со дела“, објави Јанчев, потврдувајќи дека по интервенцијата на надлежните институции животното повеќе не е кај лицата кои претходно го поседувале.

— реклама —

Според градоначалникот, коњот бил пронајден паднат на улица, врзан со каиши и железни конструкции. Прва му помогнала сограѓанка која го ослободила од ремените и му обезбедила храна и вода.

По пријавувањето на случајот интервенирале полициски службеници од Полициската станица Кавадарци, а во постапувањето била вклучена и Агенцијата за храна и ветеринарство

— реклама —

„Благодарение на преземените активности и соработката на надлежните институции, коњот е одземен од сопствениците и е заштитен од натамошно малтретирање. Тоа е најважниот исход од овој случај“, соопшти Јанчев.

Претходно, здружението за заштита на животните „Лина“ алармираше дека коњот бил крајно истоштен, гладен и жеден, а според нивните сведоштва, бил изложен и на насилство додека лежел беспомошно на улицата.

Активистите тогаш изразија загриженост дека животното, и покрај првичната интервенција, повторно било земено од лицата кои го користеле и не се наоѓало на локацијата каде што требало да биде згрижено.

— реклама —

„Коњот, за жал, и покрај наредбата од полицијата и помошта од хуманите луѓе кои буквално му го спасија животот, не е на локацијата каде што требаше да биде. Повторно е земен од оние кои го користат за свои потреби“, соопштија претходно од „Лина“.

По овие предупредувања, градоначалникот сега информира дека животното е одземено, со што, според неговото соопштение, е спречено натамошно малтретирање.

Општина Кавадарци упати благодарност до полицијата, Агенцијата за храна и ветеринарство, активистите и граѓаните кои помогнале во спасувањето на коњот.

Јанчев апелираше граѓаните да не премолчуваат кога ќе забележат насилство врз животни, туку веднаш да ги известат надлежните институции.