Грчката опозиција бара одговори: Атина можеби нема да има пристап до изворниот код на „Ахиловиот штит“

Планираната набавка на израелскиот систем за противвоздушна и ракетна одбрана „Ахилов штит“ отвори ново прашање во Грција – дали Атина ќе има пристап до изворниот код на системот. Изјава на висок израелски претставник предизвика реакции од грчката опозиција и дел од медиумите.

Моше Пател, директор на Израелската организација за ракетна одбрана, во разговор за „Катимерини“ изјавил дека изворниот код не е опфатен со лиценцата за користење на системот.

— реклама —

По ова, грчката опозициска партија ПАСОК побара од Владата да разјасни дали Атина ќе има сопственички и пристапни права врз изворниот код.

— реклама —

Портпаролот на ПАСОК за одбраната, Михалис Катринис, потсетил дека министерот за одбрана Никос Дендиас на 23 јули изјавил оти набавката на системот за грчките вооружени сили нема да биде реализирана без пристап до изворниот код.

„Ахиловиот штит“ е замислен како повеќеслоен систем за заштита од балистички ракети, непријателски авиони и беспилотни летала. Неговото јадро треба да го сочинуваат напредни радари и ракетни системи на израелските компании Rafael и IAI.

— реклама —

Набавката на системот е само дел од амбициозниот план за модернизација на грчките вооружени сили. Владата во Атина планира до 2036 година да инвестира околу 28 милијарди евра во одбраната.

Планот вклучува и набавка на до 40 американски борбени авиони F-35, како и модерни фрегати од Франција и Италија.

Спорот околу изворниот код, доколку остане нерешен, би можел да стане значајно прашање за Грција, особено имајќи ја предвид вредноста на планираната воена модернизација и потребата од долгорочна оперативна независност на грчките вооружени сили.