Грчката даночна управа започна обемна проверка на пријавените приходи од краткорочно издавање, отворајќи илјадници досиеја на даночни обврзници поврзани со недвижности огласени на дигитални платформи како Airbnb.
Независната управа за јавни приходи (AADE) користела податоци доставени директно од платформите двапати годишно за споредба на пријавените приходи со приходите евидентирани онлајн.
Со електронските проверки биле утврдени разлики од 1.000 до дури 40.000 евра помеѓу сумите пријавени пред даночните власти и податоците регистрирани на платформите.
Откритијата довеле до нов бран проверки и електронски известувања до сопствениците на недвижности, во кои се предупредува дека непостапувањето може да резултира со дополнителни даноци, камати и високи казни.
Даночните службеници анализираат илјадници случаи поврзани со краткорочно изнајмување во периодот од 2020 до 2023 година, при што фокусот е ставен на разликите меѓу податоците доставени од дигиталните платформи и пријавените информации во даночните пријави.
Според информациите од процесот на ревизија, преку платформата myAADE веќе биле испратени илјадници известувања до даночни обврзници кај кои се утврдени несогласувања во приходите.
Сопствениците имаат можност или да ги прифатат наодите и да поднесат изменети пријави, или да ги оспорат преку дополнителна документација и докази.
Посебно внимание е насочено кон случаите од даночната 2020 година, бидејќи правото на државата за ревизија истекува на крајот на 2026 година.
Даночните власти посочуваат дека дел од несогласувањата можат да произлегуваат и од технички или сметководствени проблеми, како откажани резервации, дупликати, провизии од платформите или неточен пренос на податоци.
Даночните обврзници кои навремено ќе реагираат и доброволно ќе ги коригираат пријавите може да ги намалат казните и до 50 проценти, додека оние кои ќе ги игнорираат известувањата ризикуваат целосни даночни инспекции и дополнителни финансиски обврски.
