Грција подготвува нов законски пакет со кој би се забранило користењето електрични тротинети за малолетници помлади од 18 години, најавил грчкиот министер за заштита на граѓаните, Михалис Хрисохоидис.
Говорејќи за телевизијата Скај, Хрисохоидис изјавил дека првата клучна мерка ќе биде „целосна забрана за користење електрични тротинети за лица помлади од 18 години“, пренесе Прототема.
Тој навел дека ќе биде воведено и задолжително осигурување од граѓанска одговорност за корисниците на електрични тротинети, вклучително и за возилата што се изнајмуваат, со цел да се овозможи надомест на штета во случај на несреќи и повреди.
Третата важна мерка се однесува на регулирањето на паркирањето на тротинетите на тротоарите, како и можноста за ограничување на бројот на дозволи за компаниите што ги изнајмуваат, со цел да се заштитат пешаците и јавниот простор.
Новите прописи треба да вклучуваат и построги казни за корисниците и компаниите што продаваат или увезуваат тротинети што не ги исполнуваат безбедносните стандарди или развиваат брзина над дозволените ограничувања.
