Грција се подготвува за нов топлотен бран, при што температурите во делови од земјата викендов би можеле да надминат 40 степени Целзиусови.
Според прогнозата на Националната опсерваторија во Атина, во текот на викендот се очекува дополнителен пораст на температурите, а во многу региони топлотниот бран би можел да се задржи до средината на следната недела.
Максималните температури ќе се движат од 38 до 40 степени, додека локално живата би можела да се приближи до 42 степени Целзиусови.
Грчката метеоролошка служба предупреди дека воздушните маси над земјата ќе бидат за шест до осум степени потопли од вообичаеното за овој период од годината.
Иако Грција е навикната на високи летни температури, годинава досега немаше долготрајни топлотни бранови какви што беа забележани во делови од северна и западна Европа.
Првиот топлотен бран во Грција траеше три дена во средината на јули, кога температурите во централните делови на земјата достигнаа до 42 степени.
