Сериозна водена криза ги погоди делови од Грција во екот на туристичката сезона, откако островите Лерос и Сифнос останаа со критично намалени резерви на вода за пиење, што ги принуди властите да прогласат вонредна состојба.
Одлуката ја донел Генералниот секретаријат за цивилна заштита, откако локалните власти предупредиле дека резервите на вода се на критично ниско ниво, а дел од водоснабдителните системи веќе не можат да ги задоволат потребите на населението и туристите.
На островот Лерос е воведена едномесечна вонредна состојба поради дефект на постројката за десалинизација, која има клучна улога во обезбедувањето вода за жителите. Во меѓувреме, властите на Сифнос соопштија дека долгите периоди без врнежи и зголемената потрошувачка целосно ги исцрпиле локалните водни резерви.
Градоначалниците на двата острова побарале итна помош од централната власт, вклучително и транспорт на вода со цистерни и бродови, за да се избегнат дополнителни проблеми во снабдувањето.
Кризата не е ограничена само на Лерос и Сифнос. Слични мерки веќе се во сила и на островите Лефкада и Кефалонија, што укажува на поширок проблем со водоснабдувањето во делови од Грција.
Според локалните власти, ситуацијата дополнително се влошува поради застарената водоводна инфраструктура, загубите во мрежата и зголемената побарувачка за вода во туристичките центри.
Експертите предупредуваат дека климатските промени и сè почестите сушни периоди ќе претставуваат сè поголем предизвик за медитеранските земји, особено за островските региони кои зависат од ограничени водни ресурси.
