Бројот на раѓања во Грција за 15 години се намалил за 42 отсто, покажуваат податоците на грчкиот Институт за демографски истражувања и студии. Во 2009 година биле регистрирани 117.400 раѓања, додека во 2024 година бројката паднала на 68.300.
Падот не е подеднаков во сите делови на земјата. Во шест региони од континенталниот дел на Грција намалувањето надминало 50 отсто. Најголем пад е забележан во Теспротија, Евританија, Фтиотида, Гревена, Кожани и Лерин.
Во уште десет региони бројот на раѓања е намален меѓу 45 и 50 отсто. На грчките острови падот во најголем дел е под 40 отсто, со исклучок на Кикладите и Закинтос, каде што намалувањето е под 15 отсто.
Истовремено, значително се зголемил соодносот меѓу смртните случаи и раѓањата. Во 2009 година биле регистрирани 92 смртни случаи на секои 100 раѓања, додека во 2024 година бројката достигнала 184 смртни случаи на 100 раѓања.
Од вкупно 74 регионални единици во Грција, само пет имале повеќе раѓања отколку смртни случаи – Санторини, Миконос, Кос, Наксос и Ретимно на Крит.
Од друга страна, во 17 регионални единици, од кои речиси сите се на континенталниот дел на земјата, биле регистрирани меѓу 250 и 376 смртни случаи на секои 100 раѓања.
