Гренланд изгласа промена на времето: Ќе се оддалечи од европското сметање

Поголемиот дел од Гренланд од крајот на 2027 година повторно ќе го применува старото сметање на времето, откако парламентот на арктичкиот остров изгласа враќање на временската зона ГМТ-3.

— реклама —

Промената ќе стапи во сила на 31 октомври 2027 година. Со тоа временската разлика меѓу Гренланд и Копенхаген ќе се зголеми за еден час и ќе изнесува четири часа, додека разликата со Вашингтон ќе се намали за еден час, на два часа. Островот ќе продолжи да го применува летното сметање на времето.

— реклама —

Прашањето на која временска зона треба да припаѓа Гренланд со години предизвикува дебати. Поголемиот дел од островот премина на ГМТ-2 во 2023 година, со цел временски да се усогласи со Данска и остатокот од Европа.

Премиерот Јенс-Фредерик Нилсен се спротивстави на враќањето на претходната временска зона, предупредувајќи дека тоа може да има негативни економски последици, бидејќи најважните трговски партнери на Гренланд се во Европа.

— реклама —

Тој посочи и дека промената ќе го скрати периодот во кој здравствениот систем на островот може да се консултира со специјалисти во Данска, а предупреди и на можни проблеми во воздушниот сообраќај со Европа.

— реклама —

Сепак, голем дел од жителите ја поддржуваат промената. За враќање на старата временска зона биле собрани околу 4.000 потписи во Гренланд, кој има приближно 56.000 жители.