Шведски суд пресуди дека технолошкиот гигант „Гугл“ треба да ѝ исплати 14,3 милијарди шведски круни, односно околу 1,29 милијарди евра, на компанијата за споредба на цени „ПрајсРанер“ поради нарушување на правилата за фер пазарна конкуренција.
Станува збор за најголемата досега досудена отштета за прекршување на правилата за конкуренција во историјата на Шведска. Сепак, судот одобри значително помал износ од оној што го бараше „ПрајсРанер“, која побара надомест од 64 милијарди круни, плус камата.
Тужбата беше поднесена во 2022 година, откако компанијата го обвини „Гугл“ дека ги манипулирал резултатите од пребарувањето, давајќи предност на сопствената услуга за споредба на цени на штета на конкурентите.
Од „Гугл“ соопштија дека не се согласуваат со пресудата, дека ја анализираат одлуката на судот и дека ќе ги разгледаат сите правни можности, вклучително и жалба.
„ПрајсРанер“, која од 2022 година е во сопственост на шведската компанија „Кларна“, ја поздрави пресудата, но најави дека ќе разгледа дали ќе се жали на висината на досудената отштета.
