Гувернерот Славески доби кривична пријава за несовесно работење

Генералниот секретар на СДСМ, Александар Саша Димитријевиќ, на прес-конференција соопшти дека партијата поднела кривична пријава против гувернерот на Народната банка, Трајко Славески, поради основано сомнение за сторено кривично дело „несовесно работење во службата“.

— реклама —

„Денеска поднесуваме нова кривична пријава против Трајко Славески, гувернер на Народната банка, за основано сомнение за сторено кривично дело – несовесно работење во службата, по член 353-в од Кривичниот законик. Постои основано сомнение дека со несовесно постапување предизвикал штета врз Буџетот и правниот поредок“, рече Димитријевиќ.

Тој наведе дека, според нивните информации, бил пробиен законскиот рок за предлог на вицегувернери, со што, како што кажа, било загрозено функционирањето на Народната банка.

— реклама —

Дополнително, посочи дека постојат индиции оти по истекот на мандатите на одредени лица им биле исплаќани плати за функции кои веќе не смееле да ги вршат, како и дека тие продолжиле да носат одлуки во Советот на Народната банка.

— реклама —

„Овие одлуки ги прави правно спорни и ништовни“, рече Димитријевиќ.

Од СДСМ побараа Обвинителството да ги испита наводите и да покрене постапка.

„Бараме Обвинителството да постапи, да ги испита сите наводи, да обезбеди докази и да покрене постапка. Ајде да видиме дали ќе постапува по закон или по налог“, рече Димитријевиќ.