Хакери ѝ го украле профилот, а нејзиниот лик го користеле за продажба на лажни порнографски видеа создадени со вештачка интелигенција

Дваесет и едногодишната Бет Ричардс од Јужна Австралија тврди дека се чувствува „повредено и беспомошно“ откако нејзини фотографии и видеа биле злоупотребени за создавање и продажба на порнографски содржини генерирани со вештачка интелигенција, без нејзина согласност.

Ричардс, која работи на фарма и објавува содржини на социјалните мрежи, открила дека нејзиниот профил на Фејсбук бил хакиран и дека преку него биле споделени врски до експлицитни видеа со нејзиниот лик. Содржините се продавале во приватна група за разговор, а според нејзините зборови, едно видео чинело околу 90 долари, при што на платформата имало стотици видеа.

— реклама —

Со помош на вештачка интелигенција, нејзиното лице било поставувано врз телото на друго лице за да се создадат лажни порнографски снимки. Неколку дена откако го пријавила случајот, Фејсбук ѝ го деактивирал профилот, но врските до спорните содржини и натаму биле активни.

— реклама —

Полицијата го истражува случајот, но се сомнева дека одговорните лица дејствуваат од странство, што ја отежнува нивната идентификација и гонење.

„Се чувствувам повредено и беспомошно. Не можам да спијам навечер, а немам што да направам. Го испробав апсолутно сè“, изјавила Ричардс за „7NEWS“.

— реклама —

Случајот повторно ја отвори загриженоста во Австралија за ширењето порнографски содржини создадени со вештачка интелигенција, вклучително и преку апликации што дигитално ја отстрануваат облеката од фотографии и создаваат лажни експлицитни снимки.

Премиерот на Јужна Австралија, Питер Малинускас, изјавил дека ваквото однесување претставува кривично дело и дека мора да биде проследено со соодветна истрага. Според извештајот, пет лица веќе биле уапсени во други, неповрзани случаи врз основа на новите закони против злоупотреба на длабоко лажирани содржини.

Ричардс се надева дека спорните видеа ќе бидат отстранети од интернет и дека одговорните ќе бидат изведени пред лицето на правдата.