Отрула тројца членови на семејството на поранешниот сопруг со отровни печурки – Австралијка осудена на доживотен затвор

Австралијката Ерин Патерсон ќе го помине остатокот од животот во затвор, откако Апелацискиот суд во сојузната држава Викторија ја одби нејзината жалба и ѝ ја заостри казната на доживотен затвор без можност за помилување.

— реклама —

Патерсон (52) минатата година беше осудена за убиство на тројца членови на семејството на нејзиниот поранешен сопруг, кои починале откако на ручек им послужила јадење со отровни зелени пупавки. Осудена беше и за обид за убиство на Ијан Вилкинсон, сопругот на една од жртвите, кој преживеал, но со недели бил хоспитализиран.

— реклама —

Првично ѝ беше изречена доживотна казна со можност за барање помилување по отслужени 33 години. Сепак, апелацискиот совет ја прифати жалбата на обвинителството, оценувајќи дека првичната казна не одговарала на тежината на злосторството, додека сите седум жалбени основи на одбраната беа одбиени.

Судијата Стивен Меклиш образложи дека Патерсон ја одржувала намерата да ги убие четирите лица во период од три недели – од поканата за ручек, преку подготовката и послужувањето на оброкот, до последиците од труењето. Според судот, злосторството било внимателно испланирано и проследено со низа измами, меѓу кои и тврдењата дека боледува од рак, негирањето дека собирала печурки и лагите за нивното потекло.

— реклама —

„Ова злосторство беше исклучително ладнокрвно и пресметано и заслужува најостра можна осуда“, изјави судијата Меклиш.

Патерсон не присуствувала во судницата, туку ја следела постапката преку видеоврска, без да покаже видливи емоции. По објавувањето на одлуката, членовите на семејството на жртвите се прегрнувале, видно потресени од исходот.