Хакери објавија речиси шест терабајти податоци од Берлин: Меѓу нив и доверливи одбранбени планови

Речиси шест терабајти податоци украдени од берлинската администрација се објавени на дарк веб, откако хакерската група Rhysida претходно побара откуп од околу два милиони евра. Во објавениот пакет има речиси 1,44 милиони датотеки, а меѓу нив, според наводите, се наоѓаат и исклучително чувствителни документи.

Особено загрижувачки се информациите поврзани со плановите за справување со хемиски, биолошки, радиолошки и нуклеарни закани. Меѓу објавените материјали има папка со назив „AG CBRN-Rahmenplanung“, што упатува на документи поврзани со планирањето во случај на вакви закани.

— реклама —

Според истражувачкиот новинар Ларс Винкелсдорф, објавените материјали содржат и документи од покраинската криминалистичка полиција, како и планови поврзани со националната одбрана. Тој наведува дека меѓу датотеките има информации за тајни комуникациски канали на германската сојузна влада во случај на катастрофи, податоци за компании од одбранбената индустрија и планови за постапување на владините институции во кризна состојба.

— реклама —

Винкелсдорф на платформата „Икс“ го оцени случајот како сајбер-напад од размери кои, според него, директно ја загрозуваат државата.

Покрај институционалните документи, на интернет се појавиле и голем број лични податоци, главно на државни службеници. Наводно се објавени изводи од матични книги, евиденции за отсуства од работа, приватни телефонски броеви и домашни адреси.

— реклама —

Rhysida претходно се заканила дека ќе ги објави украдените податоци доколку не биде исплатен откуп од 30 биткоини, што во моментот на барањето одговарало на околу два милиони евра. Рокот за плаќање истекол во петокот околу 15:35 часот.

Берлинскиот Сенат уште пред истекот на рокот соопштил дека начелно нема да попушти пред вакви барања за откуп. Кратко по истекот на рокот, хакерската група го објавила целиот пакет украдени податоци на дарк веб.

Берлинската администрација и политичкиот врв засега не излегле со позначајни јавни изјави во врска со објавувањето на податоците.