Хакерски напади врз супермаркети во Италија, температурите во фрижидерите достигнувале 50 степени

Хакерски напади врз системите за управување со фрижидери и други уреди за ладење во супермаркети предизвикаа загриженост во Италија, каде што денеска е предвиден итен состанок со учество на надлежните државни служби.

— реклама —

Напади биле пријавени во шест продавници на Сицилија, како и во угостителска компанија во Тоскана и производител на замрзната храна во Емилија-Ромања. Генералниот директор на групацијата „Кооп Раденца“, Џузепе Спадаро, потврдил дека најмалку четири супермаркети од нивниот синџир на Сицилија биле цел на хакерски напади.

— реклама —

Од „Кооп“ соопштиле дека досегашните проверки не откриле неправилности во системите за ладење и дека стручните тимови постојано ги следат контролните уреди. Во соработка со Националната агенција за сајбер-безбедност биле активирани соодветните безбедносни постапки.

Слични инциденти претходно биле регистрирани и во Белгија, Шведска, Луксембург, Холандија, Финска, Ирска и Естонија. Во тие случаи хакери од далечина ги менувале температурите на системите за ладење, кои достигнувале и до 50 Целзиусови степени.

— реклама —

Националната агенција за сајбер-безбедност ги повика компаниите во малопродажбата, прехранбената логистика и синџирот на ладно складирање да ја проверат изложеноста на своите системи на интернет и, каде што е потребно, да ги изолираат од корпоративните мрежи. Меѓу препорачаните мерки се користење ВПН и повеќефакторска автентикација за далечински пристап, засилен надзор на привилегираните кориснички сметки и ажурирање на уредите.

— реклама —

Случајот го следи и парламентарниот комитет за безбедност КОПАСИР, кој се очекува да побара од владата најнови информации за нападите. Предвидени се и сослушувања на раководителите на италијанските служби за внатрешна безбедност и сајбер-безбедност.