Хамнеи ја подигна борбената готовност: Иран се подготвува за можен нов судир

Иранскиот врховен лидер Моџтаба Хамнеи им наредил на воените команданти да ја ажурираат листата на цели и да ја зајакнат одбраната, со порака дека на секоја закана треба да одговорат веднаш и ефикасно.

За време на состанокот со највисоките воени команданти, Хамнеи истакнал дека високото ниво на борбена готовност за силен одговор кон противниците е еден од клучните предуслови за постигнување максимално одвраќање.

— реклама —

„Доколку непријателите повторно започнат воени или терористички напади, вооружените сили на Исламската Република и иранскиот народ ќе го одредат времето и условите за нивно завршување“, порачал Хамнеи, пренесува иранската новинска агенција ИРНА.

— реклама —

Според неговите зборови, ажурирањето на листата на цели треба да овозможи различни материјални и нематеријални ресурси на Соединетите Американски Држави и Израел да бидат во дострелот на иранските вооружени сили.

Хамнеи укажал и на потребата од зајакнување на воено-разузнавачката инфраструктура, унапредување на одбранбените и безбедносните капацитети со примена на нови технологии, како и развој на домашните воени способности во областа на воената доктрина и тактиката.

— реклама —

Говорејќи за регионалната ситуација, тој ја пофалил, како што навел, истрајноста на „фронтот на отпорот“ во различни земји, оценувајќи дека единството на неговите членки има стратешко значење за обликување на новиот политички и безбедносен поредок во Западна Азија.

Тој изразил надеж дека таквиот поредок ќе придонесе за поголема солидарност меѓу исламските народи и владите и ќе го отвори патот за создавање „нова исламска цивилизација“.

Пораките на Хамнеи доаѓаат во период на зголемени тензии меѓу Вашингтон и Техеран, со продолжување на американските закани за можно обновување на воените напади по изборите за Конгресот на САД, закажани за 3 ноември.