(Видео) Хаос во Германија: Молотови коктели, запалени барикади и грабежи, над 200 уапсени

По претежно мирните демонстрации на младите во Германија, во текот на изминатата ноќ во неколку големи градови избувнало насилство. Демонстрантите ограбувале продавници, палеле барикади и фрлале молотови коктели врз полицијата, а уапсени се повеќе од 200 лица.

Најсериозните инциденти биле забележани во Франкфурт, Келн, Берлин и Хамбург, пренесува „Шпигел“.

Франкфурт

Во Франкфурт ситуацијата ескалирала во доцните вечерни часови, кога демонстрантите упаѓале во продавници и краделе стока. Полицијата уапсила околу 30 лица, а за време на интервенцијата биле запленети и две парчиња оружје.

— реклама —

Келн

Насилство избувнало и во Келн, каде што демонстрантите фрлале шишиња и велосипеди кон полицајците. Нападот се случил на Катедралниот плоштад, во близина на главната железничка станица, при што едно лице било повредено. Приведени биле пет лица.

Шефот на полицијата во Келн, Јоханес Херманс, изјавил дека од маскираните учесници на протестите биле запленети молотови коктели и чекани за итни случаи.

— реклама —

„Целта поради која ги носеле овие предмети е очигледна“, изјавил Херманс.

Берлин

Во Берлин демонстрантите фрлале петарди, пиротехнички средства, но и јајца кон полицајците и новинарите. На протестите биле присутни и приврзаници на пропалестинското движење, кои носеле палестински знамиња.

Портпаролот на берлинската полиција соопштил дека биле уапсени 56 лица, додека речиси 30 полицајци биле повредени.

— реклама —

Хамбург

Најголем број демонстранти се собрале во Хамбург, каде што, според полициските податоци, на улиците имало околу 6.700 луѓе.

Дел од демонстрантите, облечени во црно и со маски на лицата, запалиле барикади. Полицијата ги растерала насобраните, употребила бибер-спреј, а пожарот бил изгаснат со водени топови. Уапсени биле околу 120 лица кои учествувале во нередите.

Протести одржани во 34 градови

Демонстрациите во 34 германски градови биле организирани на повик на иницијативата „Генерација З решава“ („Gen Z regelt“), која, според сопствените соопштенија, се оградила од насилството.

Протестите првично биле организирани како мирни собири, со барања за поголемо финансирање на училиштата, подобра поддршка за лицата кои се соочуваат со зависности и подостапна психотерапија.

Учесниците барале и конкретни мерки за справување со зголемените трошоци за живот, поголема социјална правда и посилна заштита на климата.