Хаос во Грција: Поројна вода носеше автомобили и поплави куќи, жена погодена од гром

Силното невреме што во саботата попладне ја зафати областа Мани на Пелопонез предизвика големи поплави и материјална штета. Водените надојденици носеле автомобили, поплавувале куќи и туристички објекти, а на повеќе места биле оштетени и патиштата.

— реклама —

Според грчките медиуми, ситуацијата се влошила за само неколку минути. Во населеното место Итило, жена била погодена од гром додека се наоѓала во автомобил. Таа била пренесена со возило на Итната медицинска помош во болница во Спарта.

Противпожарната служба добила десетици повици за помош, а најмалку десет лица биле безбедно извлечени од своите возила.

— реклама —

Најтешко погодени се населените места Алипа, Кокала, Итило, Лимени и Каравостаси, каде што поројниот дожд предизвикал големи количества вода и кал. Во Алипа, на одредени места водата достигнала до прозорците на објектите, а поплавени биле куќи и туристички сместувања.

— реклама —

Водената стихија однела и неколку автомобили во морето, додека делови од патната инфраструктура биле уништени. Оштетени се и локални мостови.

На социјалните мрежи се појавија снимки од последиците од невремето, на кои се гледа како огромни количества вода се слеваат од повисоките делови и навлегуваат во домовите и објектите.

— реклама —

Министерот за здравство на Грција, Адонис Георгиадис, соопшти дека Националниот здравствен систем е ставен во целосна готовност поради последиците од невремето.