Хаосот во Полска не стивнува: Претседателот свика итен состанок

Полскиот претседател Карол Навроцки свика итни консултации со претставници на парламентарните партии поради ескалацијата на судирот околу Уставниот суд, кој предизвика сериозна политичка криза во земјата.

„Поради заканата за внатрешната безбедност на Република Полска, денеска свикувам итни консултации со учество на претставници на парламентарните сили, со цел стабилизирање на политичката ситуација и обновување на уставниот поредок“, изјави шефот на кабинетот на Навроцки, Павел Шефернакер, пренесе полската телевизија „Република“.

— реклама —

Терминот на одржување на консултациите засега не е прецизиран.

Навроцки вчера ја прекина официјалната посета на Сенегал и се врати во Полска откако полицијата влезе во просториите на Уставниот суд, а претседателот на таа институција, Богдан Свјенчковски, беше суспендиран.

— реклама —

„Во ваков момент претседателот мора да биде во Полска. Ја прекинувам посетата на Сенегал и се враќам“, напиша Навроцки на платформата Икс.

Полицијата соопшти дека нејзините припадници влегле во зградата на Уставниот суд по инцидентите пред институцијата, за време на кои врз полицајците биле фрлани опасни предмети.

— реклама —

Демонстрантите се собрале пред зградата на судот и се обиделе да ја пробијат заштитната ограда, поради што биле распоредени дополнителни полициски сили.

Уставниот суд на својата веб-страница објави дека Свјенчковски е суспендиран, додека министерот за правда Валдемар Журек поднел барање за негово разрешување од функцијата вршител на должноста претседател на судот, како и за одземање на неговиот имунитет.

Долготрајниот политички спор околу Уставниот суд практично ја парализирал работата на оваа институција, наведува Ројтерс.

Судирот дополнително се продлабочил откако Навроцки одбил да положи заклетва пред тројца од шесте судии избрани од парламентот, додека Свјенчковски одбил да им овозможи на судиите избрани со гласовите на актуелното парламентарно мнозинство да ја преземат функцијата.