Херои без име: Двајца пилоти-патници го стабилизирале авионот на „Flydubai“

Авион на „Flydubai“ со 182 патници бил на пат кон катастрофа откако копилотот го нападнал капетанот, а двајца пилоти, кои патувале како патници, влегле во кабината и помогнале да се стабилизира авионот.

Три дена по инцидентот, нивните имиња сè уште не се јавно познати. Од „Flydubai“ само потврдиле дека станувало збор за членови на екипажот кои биле на должност и патувале со авионот.

Патникот Даниел Шлихтер за „Associated Press“ раскажал дека присуството на двајцата дополнителни пилоти во авионот било случајност. Тие биле донесени за да патуваат назад од Тел Авив кон Дубаи.

— реклама —

Според неговото сведоштво, ситуацијата во кабината станала драматична откако копилотот го нападнал капетанот. На леталото настанала паника, а капетанот, иако бил тешко повреден и крвав, успеал да ја отвори вратата од кабината.

Еден од патниците го зграбил копилотот и го извлекол од кабината, додека други патници се обидувале да го совладаат.

— реклама —

Во тој момент, еден од пилотите кои патувале како патници влегол во кабината за да помогне во преземањето на контролата врз авионот. Набргу му се придружил и вториот пилот, по што ја затвориле вратата.

Шлихтер вели дека авионот претходно нагло се спуштал и дека на пилотите им биле потребни околу 10 или повеќе минути повторно да го стабилизираат.

Во меѓувреме бил испратен повик за помош, а пилотите итно барале место каде што би можеле да слетаат.

— реклама —

По стабилизирањето на летот, дел од патниците биле загрижени бидејќи не знаеле кои се двајцата мажи во кабината и што се случува внатре.

„По стабилизирањето на авионот, тие воопшто не комуницираа со нас и морам да кажам дека тоа ме загрижи“, раскажал Шлихтер.

— реклама —

Тој стравувал дека ситуацијата би можела да се влоши и дека авионот би можел да биде киднапиран и пренасочен кон Иран.

По околу 45 минути, пилотите ги информирале патниците дека ќе слетаат во Табук, Саудиска Арабија, и дека сè ќе биде во ред.

Шлихтер тогаш решил да им верува. Авионот безбедно слетал, а двајцата пилоти кои се нашле во кабината во клучниот момент остануваат без јавно објавени имиња.