„Ходник дипломатија на Мицкоски со 50 луѓе на екскурзија и антимон со вредност помала од DЈ“, велат од СДСМ

СДСМ преку соопштение ја критикува посетата на премиерот Христијан Мицкоски на Соединетите Американски Држави, оценувајќи дека таа не донела резултати какви што биле најавувани.

Од партијата велат дека Мицкоски цела недела престојувал во САД со делегација од околу 50 лица, а како резултат од посетата го издвојува грантот од 5 милиони долари за развој на проектот за антимон.

— реклама —

СДСМ тврди дека неформалниот разговор со американскиот државен секретар Марко Рубио во ходник бил претставен како средба на високо политичко ниво. Исто тврдат дека грантот од 5 милиони долари се претставува како еден од најголемите резултати од посетата. За грантот за развој на проектот за антимон кај Крстов Дол, во близина на Луке и Крива Паланка, има потврдени информации дека е обезбедено финансирање од 5 милиони долари за развој на проектот.

Од СДСМ изнесуваат и критики во однос на проектот за антимон, посочувајќи на можни ризици по животната средина и здравјето на луѓето. Партијата наведува дека антимонот се користи и во воената индустрија и ја обвинува Владата дека не обезбедува доволно заштита на водата, почвата и здравјето на населението.

— реклама —

Во соопштението СДСМ се повикува и на состојбата со извештаите за квалитетот на водата, наведувајќи дека во Гостивар 11 недели не бил објавен извештај, како и дека во повеќе од 50 населени места немало објавени извештаи.

— реклама —

Проектот за антимон сè уште е во фаза на развој. Според достапните информации, средствата од 5 милиони долари се наменети за активности поврзани со утврдување на техничката и комерцијалната изводливост на проектот, а не претставуваат завршена инвестиција во експлоатација.

СДСМ ја поврзува посетата на Мицкоски со трошоците за прославата на Денот на независноста, за која претходно објави дека биле потрошени 5,53 милиони евра од Државната лотарија.

„Концертот го платија скапо, богатството на Македонија го распродаваат ефтино, за багателна цена. Разликата е во провизијата“, велат од СДСМ.

Од опозициската партија порачуваат: „Македонија не е на продажба!“