СДСМ: Скопје без сигурен превоз, Ѓорѓиевски со дрон и билборд, автобуси од Орбан и ѓубре од Куманово

СДСМ преку соопштение обвинува дека Скопје се соочува со сериозни проблеми во јавниот превоз, одржувањето на градот и управувањето со отпадот, додека градоначалникот Орце Ѓорѓиевски, според партијата, повеќе внимание посветува на рекламирање отколку на решавање на проблемите на граѓаните.

Од партијата прават споредба со времето на Никола Груевски, кога биле набавени автобуси од Кина, и тврдат дека актуелната градска власт го повторува истиот пристап со најавените автобуси од Унгарија, поврзани со владата на Виктор Орбан. Според СДСМ, јавниот превоз се третира како тендер, наместо како основна услуга за граѓаните.

— реклама —

Партијата критикува и дел од активностите на градоначалникот, наведувајќи дека дроновите и билбордите не ги решаваат проблемите со отпадот, дупките на улиците и сообраќајниот метеж. Од СДСМ посочуваат дека Вардар и Лепенец се загадени и оценуваат дека на граѓаните им се потребни конкретни резултати, а не промотивни активности.

— реклама —

Во соопштението се отвора и прашањето за отпадот. СДСМ наведува дека жителите на Пчиња ја блокираат Краста поради пожарите и чадот, а го обвинува градоначалникот на Куманово, Максим Димитриевски, дека отпадот од Куманово се пренасочува кон скопската депонија „Дрисла“. Според партијата, тоа дополнително го оптоварува градот, кој и самиот има проблеми со собирањето на сметот.

СДСМ предупредува и на тешкотиите во јавниот превоз, тврдејќи дека граѓаните чекаат и до 40 минути на автобуските постојки, автобусите се преполни, а некои линии се пренасочуваат. Партијата додава дека најавите за дополнителни автобуси од минатата година сè уште не се реализирани.

— реклама —

Од СДСМ оценуваат дека состојбата може дополнително да се влоши со доаѓањето на зимата, кога снегот и ниските температури ќе ги отежнат условите за чекање на постојките, а доцнењето на автобусите ќе создава дополнителни проблеми.

„Градот се рекламира од дрон и билборд, а не се одржува на земја“, наведуваат од СДСМ, обвинувајќи ја градската власт за неодговорно управување и за недостиг од конкретни решенија.

Од партијата заклучуваат дека последиците од ваквата состојба ги поднесуваат граѓаните, кои губат време, трпение и пари поради проблемите со превозот и комуналните услуги.