СДСМ: Ги поддржуваме војниците – ќе поднесеме законско решение за нивните барања

СДСМ преку соопштение најави дека ќе поднесе законско решение во Собранието со кое ќе се опфатат барањата на професионалните војници за еднакви права, повисоки плати и поголема сигурност во работниот однос.

— реклама —

Од партијата сметаат дека е неправедно поранешните припадници на Армијата кои заминале во пензија пред 14 февруари 2024 година да добијат значително пониски отпремнини од оние кои се пензионирале по овој датум. Според СДСМ, сите војници кои со години ѝ служеле на државата и извршувале исти должности треба да имаат еднаков третман.

Партијата ги поддржува и барањата за трансформирање на работниот однос на професионалните војници во неопределено време по петтата година, согласно Законот за работните односи, како и за зголемување на нивните плати.

— реклама —

Од СДСМ тврдат дека во изминатите две години, откако ВМРО-ДПМНЕ е на власт, нема зголемување на платите во Армијата. Воедно потсетуваат дека за време на нивното владеење платите на офицерите, подофицерите, професионалните војници и цивилниот персонал биле етапно зголемени за 15 проценти.

— реклама —

Од партијата наведуваат и дека членството на Македонија во НАТО било обезбедено во 2020 година, оценувајќи дека условите за припадниците на Армијата треба постојано да се подобруваат.

СДСМ упати критики до Владата, обвинувајќи ја дека средствата ги насочува кон, како што наведуваат, сомнителни тендери, наместо кон зголемување на платите и поддршка на работниците и земјоделците.

— реклама —

Од партијата порачуваат дека војниците кои ја гарантираат безбедноста на државата заслужуваат сигурни работни места, достоинствени примања и еднакви права, особено имајќи предвид дека Македонија е членка на НАТО.