Холандија и Белгија потврдија дека ќе учествуваат на Изборот за песна на Евровизија во 2027 година, кој ќе се одржи во Бургас, Бугарија.
Холандскиот јавен радиодифузен сервис НПО соопшти дека земјата сепак ќе испрати свој претставник на следното издание, иако претходно било најавено дека повторно ќе го бојкотира натпреварот поради учеството на Израел. Холандија годинава не настапи на Евровизија во Виена, за првпат по 24 години, но го емитуваше натпреварот.
Белгија, пак, по подолго разгледување на можноста за учество, потврди дека и во 2027 година ќе биде дел од Евровизија. Белгискиот јавен радиодифузер ВРТ ја информирал Европската радиодифузна унија (ЕБУ) за одлуката.
Извршниот директор на ВРТ, Фредерик Делаплас, посочи дека учеството на Белгија не претставува одобрување или нормализирање на случувањата во Газа. Тој истакна дека радиодифузерот извршил притисок врз ЕБУ за промени во правилата и оти добиле уверување дека тие промени ќе бидат видливи.
Во меѓувреме, Шпанија и Ирска остануваат на поинаква позиција. Директорот на шпанскиот јавен радиодифузер РТВЕ, Хозе Пабло Лопез, најави дека ќе предложи Шпанија да не учествува на Евровизија 2027 поради учеството на Израел. Конечната одлука треба да ја донесе Управниот одбор на РТВЕ.
Ирскиот јавен радиодифузер РТЕ веќе соопшти дека Ирска нема да учествува на следното издание ниту ќе го пренесува натпреварот во Бургас.
Во август, ЕБУ објави нови правила поврзани со учеството на земји во вооружен конфликт, според кои таква земја не може да биде домаќин на Евровизија.
