Хрватска купува јужнокорејски ракетен систем со дострел до 500 километри

Хрватска ја засилува својата воена моќ со набавка на јужнокорејскиот ракетен артилериски систем К239 „Чунму“ и балистички ракети ЦТМ-Икс со дострел до 500 километри. Договорот со компанијата „Ханва аероспејс“ е вреден 435,2 милиони евра без ДДВ, а предвидува набавка на 18 самоодни лансери со испорака до 2029 година.

— реклама —

Договорот го потврди хрватскиот премиер Андреј Пленковиќ по средбата во Загреб со претседателот на Националното собрание на Република Кореја, Чу Џонг-сик. По средбата, тој на социјалната мрежа Икс соопшти дека одбранбената соработка меѓу двете земји дополнително се продлабочува со меморандум за разбирање меѓу министерствата за одбрана и договорот за набавка на ракетниот систем.

Податоците за дострелот на ракетите ги објавил производителот. Претставници на „Ханва аероспејс“ на саемот АДЕКС 2025 навеле дека ракетата ЦТМ-Икс овозможува дострел на ЦТМ-290 до околу 500 километри, со задржување на приближно 80 отсто од моќта на боевата глава, објави специјализираниот портал „Навал њуз“.

— реклама —

И норвешката Агенција за одбранбени материјали наведува дека системот „Чунму“, за кој Норвешка склучи договор за набавка во јануари, може да испукува високопрецизни балистички ракети на растојание до 500 километри.

— реклама —

Претходните најави на хрватските власти се однесуваа на ракети со дострел од 30 до повеќе од 300 километри. Новите балистички ракети треба да обезбедат дополнителни способности за хрватската армија во рамките на нејзиниот систем за одвраќање.

Хрватска ги потпиша договорите со „Ханва аероспејс“ на 10 септември. Тогаш Пленковиќ изјави дека земјата добива воени способности какви што досега немала. Според хрватските медиуми, „Чунму“ ќе ги надополни веќе договорените американски ракетни системи ХИМАРС.

— реклама —

Покрај одбранбената соработка, Пленковиќ и Чу Џонг-сик разговарале и за зголемување на трговската размена, јужнокорејските инвестиции во Хрватска и соработката во енергетиката, зелените технологии и сообраќајната инфраструктура. На средбата станало збор и за поддршката за Украина и за зајакнувањето на соработката меѓу европските и индо-пацифичките партнери.