Хутите ослободија 159 лица притворени во Јемен

Јеменската група Хути ослободи 159 лица кои неодамна биле притворени, соопшти Меѓународниот комитет на Црвениот крст (МКЦК). Ослободувањето било спроведено еднострано од властите во Сана, со поддршка на оваа хуманитарна организација.

— реклама —

Претставници на МКЦК разговарале со притворените пред нивното ослободување и ги известиле нивните семејства. Организацијата обезбедила и помош за нивното враќање дома. Медицинските тимови ја процениле нивната здравствена состојба и способноста за патување, а за оние на кои им била потребна дополнителна помош биле организирани соодветни услуги.

Од МКЦК појасниле дека ослободувањето го иницирал Националниот комитет за прашања на заробениците, поврзан со Хутите, и дека тоа не е дел од Стокхолмскиот договор. Организацијата нагласила дека не учествувала во одлуката за тоа кои лица ќе бидат ослободени и колкав ќе биде нивниот број.

— реклама —

Хутите во петокот соопштиле дека ослободените лица се заробеници кои доброволно се предале за време на неодамнешните настани, без да учествуваат во борбите. Според групата, ослободувањето било овозможено со амнестија прогласена од Махди ал Машат, претседател на нивниот Врховен политички совет. Локалните власти ќе го координираат враќањето на ослободените кај нивните семејства и во местата од кои потекнуваат.

— реклама —

Стокхолмскиот договор беше постигнат во декември 2018 година во Шведска, под покровителство на Обединетите нации, меѓу меѓународно признатата јеменска влада и Хутите.

Ослободувањето се случува во период на обновени судири меѓу Хутите и силите што ја поддржуваат меѓународно признатата јеменска влада, зад која стои коалиција предводена од Саудиска Арабија.

Хутите од 2014 година ја контролираат престолнината Сана и големи делови од северен и западен Јемен. Коалицијата предводена од Саудиска Арабија интервенираше во конфликтот во 2015 година, поддржувајќи ја меѓународно признатата влада.