И АХВ потврди дека во Козле е заловен волк: му го проверуваат здравјето, па ќе видат што со него

Агенцијата за храна и ветеринарство официјално потврди дека дивото животно кое синоќа беше заловено во скопската населба Козле е волк.

Од АХВ информираат дека официјален ветеринар доцна попладнево спровел вонреден инспекциски надзор во скопската зоолошка градина, каде што животното било згрижено по заловувањето.

„Врз основа на искуството во работата со диви животни и спроведениот стручен преглед на физичката градба на заловеното животно и неговото однесување, како и на проверката на други важни факти за утврдување на неговиот вид, од страна на официјалниот ветеринар потврдено е дека станува збор за диво животно од видот волк“, соопшти АХВ.

Оттаму додаваат дека дополнително ќе се утврдува здравствената состојба на животното, по што ќе се одлучува за понатамошните постапки.

„Дополнително, ќе се утврдува и тековниот здравствен статус на заловеното диво животно и ќе се решава за натамошните постапки во врска со него“, велат од Агенцијата.

Претходно, од ЗОО-Скопје посочија дека волкот бил заловен во Козле со ремен и ланец, поради што постоеја сомнежи дека бил чуван како домашно милениче.