И по речиси една година од поднесувањето на известувањата од АНБ до Обвинителството за гонење организиран криминал и коруцпија, предметот за незаконско следење на тогашниот опозициски лидер, а сега премиер Христијан Мицкоски, како и на повеќе медиумски работници, сè уште е заглавен во предистражна постапка.
Од Основното јавно обвинителство за гонење организиран криминал и корупција за „Скопје1“ велат дека се прибираат податоци и се проверуваат наводите, но не откриваат дали има осомничени лица, ниту дали се опфатени оперативци или поранешни директори.
„Предметот се наоѓа во фаза на предистражна постапка. Се преземаат дејствија за проверка на наводите во пријавите и прибирање на потребните податоци и докази. Во интерес на постапката и законските ограничувања, во оваа фаза не можеме да споделиме информации за евентуален статус на лица“, велат од Обвинителството.
Во јавноста, пак, веќе подолго време се отвора прашањето дали институциите намерно одолговлекуваат, особено по информациите дека за физичко следење на лица понекогаш била доволна само една службена белешка со неточни податоци.
Според сознанија од Агенцијата за национална безбедност, под раководство на директорот Бојан Христовски, до Обвинителството биле доставени три известувања за сомнежи против поранешен директор и група вработени. Станува збор за периодот од 2019 до 2024 година, кога, според истите извори, биле следени тогашниот опозициски лидер Мицкоски, новинари, медиуми, но и јавен обвинител за кој се пишуваше дека е Вилма Русковска и министер од тогашната власт.
Внатрешната истрага во АНБ утврдила дека биле формирани предмети за оперативни обработки на новинари и медиуми, со цел влијание врз политичките процеси, при што под надзор биле ставени и нивните контакти.
Покрај тоа од АНБ, биле констатирани сериозни злоупотреби – незаконско следење на комуникации, користење на ресурси на Агенцијата за приватни цели, како и намерно одолговлекување на безбедносни проверки, меѓу кои и за пратеник од тогашната опозиција.
Во периодот на кој се однесуваат наводите, со АНБ раководеле Виктор Димовски и Заре Милошевски.
И покрај сериозноста на наводите и опфатот на случајот, одговорот од институциите засега останува ист – предистрага, без рокови, без одговорност и без јасен сигнал дали некој ќе сноси последици.
Плусинфо: Мицкоски, Русковска, новинарите Ландов и Златев биле таргети - списокот на незаконски следени и прислушувани јавни личности е многу поголем
По известувањето на АНБ дека до Обвинителството пријавиле незаконско и непрофесионално постапување и следење на лидер на опозициска партија, како и група новинари, „Плусинфо“ објави дека на списокот за незаконско следење бил и јавен обвинител. Порталот, повикувајќи се на свои извори, пишува дека во периодот од 2019 до 2024 година, мета биле лидерот на ВМРО-ДПМНЕ, Христијан Мицкоски, поранешната обвинителка Вилма Русковска и новинарите Кристијан Ландов и Љупчо Златев.„Плусинфо“ пишува дека Вилма Русковска во изјава им потврдила дека била незаконски следена.„Немам информации дали сум била прислушувана, но извор во кој имам доверба ми кажа дека сум била незаконски следена од страна на Јовче Ременски, сопругот на поранешната пратеничка Фросина Ременски, против која во тоа време поведов обвинение,“ изјави Русковска.Плусинфо со Русковска ja споделиле и информацијата дека била незаконски прислушувана, во еден или повеќе разговори со новинарот Кристијан Ландов, на што искоментирала: „Јас за тоа немам информации, но не би ме изненадило да било така. Можно е јас да сум била таргет, а можно е и новинарот да бил таргет. Се надевам дека и тоа прашање ќе се расветли“.Ландов: „Не сум имал причина да се сомневам“Порталот побарал коментар и од новинарот Ландов, кој рекол: „Не сум имал причина да се сомневам. Дали било можно или не, тоа треба да го кажат службите. Со Русковска сум имал комуникација, како и со други обвинители што работеа на предмети од јавен интерес. Таа комуникација датира од 2020 година наваму, кога Русковска беше шеф на ОЈО-ГОКК“.Златев: „Се отвораа апсурдни предмети, целта беше да бидам следен“Новинарот Љупчо Златев, пак, тврди дека уште во 2019 година добил информации од свиркачи во АНБ дека бил ставен под посебни истражни мерки.„Во периодот 2019–2024 година за мене се отвораа апсурдни предмети, со единствена цел да бидам следен и прислушуван. Се користеа белешки со измислени содржини, од луѓе кои случајно ги познавав и кои постојано се обидуваа да стапат во контакт со мене. Еден од нив е осуден за убиство, друг е подкастер и уредник, трет е измамник кој пропадна една од најголемите градежни компании,“ изјави Златев.За контрола на посебните истражни мерки, според „Плусинфо“, за целиот период бил задолжен сегашниот републички обвинител, Љупчо Коцевски.Целиот текст на Плусинфо
Македонија | пред 7 месеци
