Повторното отворање на Ормускиот теснец по потпишувањето на меморандумот за разбирање меѓу САД и Иран донесе олеснување на глобалниот енергетски пазар, но аналитичарите предупредуваат дека последиците од неколкумесечниот прекин на испораките на нафта сè уште не се надминати.
Според проценките на аналитичката компанија „Кплер“, во изминатите речиси четири месеци на светскиот пазар не пристигнале околу 1,15 милијарди барели нафта од Блискиот Исток, што довело до значително намалување на глобалните резерви.
Стратешките резерви на нафта на Меѓународната агенција за енергија се на најниско ниво во последните децении, додека резервите во САД се најниски во изминатите 43 години. Во одредени складишни центри, како што е Кушинг во американската сојузна држава Оклахома, количините на сурова нафта се приближуваат до нивоа што можат да го отежнат нормалното снабдување.
Иако цената на нафтата во последните недели значително се намали поради оптимизмот околу договорот меѓу Вашингтон и Техеран, дел од аналитичарите сметаат дека пазарот прерано реагирал и дека ризикот од нов раст на цените останува реален.
Според нив, отворањето на теснецот нема веднаш да ја нормализира состојбата. Потребно е време за враќање на танкерите, обновување на производството и повторно воспоставување на редовните транспортни рути.
Од друга страна, дел од експертите сметаат дека пазарот наскоро ќе добие дополнителни количини нафта, особено од земјите членки на ОПЕК, кои имаат интерес да го зголемат производството и извозот.
Тие посочуваат дека, и покрај намалените резерви, глобалниот пазар сè уште располага со доволно залихи за да избегне сериозни нарушувања во снабдувањето.
Аналитичарите оценуваат дека во наредните недели клучно ќе биде темпото со кое ќе се обновуваат испораките преку Ормускиот теснец, низ кој поминува значителен дел од светската трговија со нафта.
Додека едни предупредуваат на можен нов раст на цените поради исцрпените резерви, други очекуваат дека зголеменото производство и постепената нормализација на транспортот ќе придонесат за стабилизирање на пазарот во втората половина од годината.
