Во Шпанија се идентификувани шест жртви од еден од најсмртоносните шумски пожари во историјата на земјата, додека форензичките тимови продолжуваат со ДНК анализи за да го утврдат идентитетот на уште шест загинати лица.
Според властите, меѓу идентификуваните жртви има брачен пар од Шпанија и Велика Британија, како и двајца британски државјани, една Французинка и еден Белгиец. Сите жртви се возрасни лица.
Во меѓувреме, 93-годишна британска државјанка им подлегнала на повредите во болница, со што бројот на загинати се искачи на 13. Во пожарот се повредени уште седум лица, а огнената стихија уништила околу 7.000 хектари.
Пожарот, кој се смета за најсмртоносен во Шпанија во последните повеќе од четири децении, ги затекнал жителите во тешко пристапно подрачје со расфрлани куќи, додека се обидувале да избегаат од пламените јазици.
Во исто време, Франција се соочува со голем шумски пожар во познатата шума Фонтенбло, каде што околу 400 пожарникари се обидуваат да ја стават огнената стихија под контрола. Пожарот избувнал во близина на автопат, а досега уништил околу 800 хектари шума.
Повеќе од илјада жители и туристи се евакуирани од областа околу шумата Фонтенбло, која е позната по историскиот дворец и претставува едно од најголемите непрекинати шумски подрачја во Западна Европа.
Француските пожарникари интервенираат и на други локации низ земјата, каде што третиот овогодишен топлотен бран дополнително ги поттикнува пожарите. Националната метеоролошка служба стави 37 департмани под највисоко, црвено ниво на предупредување поради екстремно високите температури.
