Институтот за јавно здравје (ИЈЗ) објави препораки за заштита на граѓаните поради најавениот топлотен бран, кој, според Управата за хидрометеоролошки работи (УХМР), ќе трае од 1 до 7 август, кога во делови од земјата се очекуваат температури и над 40 степени.
Од ИЈЗ препорачуваат да се избегнува директно изложување на сонце и активности на отворено во периодот од 11 до 17 часот, да се носи светла и лесна облека, капа и очила за сонце, како и престојот да биде во климатизирани или разладени простории.
Граѓаните се советуваат да внесуваат доволно вода и безалкохолни пијалаци, без да чекаат да почувствуваат жед, да избегнуваат алкохол, кофеин и многу ладни пијалаци, како и масна, висококалорична храна и храна богата со шеќери.
Особена претпазливост се препорачува за лицата постари од 60 години, бремените жени, децата, лицата со хронични заболувања, работниците кои работат на отворено и другите ранливи категории. Од Институтот апелираат овие лица редовно да ја земаат пропишаната терапија и при каква било промена на здравствената состојба да се консултираат со својот матичен лекар.
Во случај на симптоми како вртоглавица, слабост, силна жед, главоболка или мускулни грчеви, ИЈЗ советува лицето веднаш да се премести на поладно место и да внесува течности. Доколку некој има топла и сува кожа, грчеви или е во бессознание, потребно е веднаш да се повика Итната медицинска помош на 194 или 112, а до пристигнувањето на медицинските екипи лицето да се разладува и да се постави во соодветна положба.
Според најавата на УХМР, под влијание на топла воздушна маса од југ, времето ќе биде сончево и многу топло, со дневни температури над 32 степени во целата земја, а на одделни места тие ќе надминат и 40 степени Целзиусови. Високи температури се очекуваат и во текот на вечерните и ноќните часови.
