Илјадници мигранти три недели заглавени во Сеута: Нема место во прифатните центри

Илјадници мигранти кои пред три недели нерегуларно влегле од Мароко во шпанската северноафриканска енклава Сеута и натаму се наоѓаат во градот, додека локалните власти се обидуваат да обезбедат дополнителни простори за нивно сместување.

За време на викендот, повеќе од 300 мигранти се собрале во близина на прифатната зона Лома Колменар, каде што се наоѓа еден од привремените центри за нивно згрижување. Објектот е исполнет, а оние кои останале надвор чекаат да се ослободи место и да започне постапката за азил.

— реклама —

Додека чекаат решение за својот статус, дел од мигрантите деновите ги поминуваат низ градот, а ноќите ги минуваат во шуми и напуштени индустриски објекти. Еден од нив, Хамза, млад Мароканец кој во Сеута пристигнал пред 24 дена, вели дека спие во шума и дека храна добива од Црвениот крст.

— реклама —

„Чекаме какво било решение“, вели тој, додавајќи дека нема доволно места поради големиот број луѓе.

Дел од мигрантите привремено се сместиле и во индустриски хали во Ел Тарахал, област во близина на границата со Мароко. Меѓу нив е и млада жена која пред 25 дена пристигнала од Мароко со пријателка и својата деветгодишна ќерка, надевајќи се дека ќе најде подобри услови за живот и образование за детето.

— реклама —

Таа раскажува дека пред да се смести во халата, три дена поминала во планините. Според неа, условите се исклучително тешки бидејќи нема тоалети и тушеви, а дождот дополнително ја влошува ситуацијата.

— реклама —

И покрај тешките услови, дел од мигрантите сè уште се надеваат дека ќе можат да останат во Сеута и да започнат нов живот. Меѓу нив е и Мохамед, кој со себе ги носи дипломите за обука за молер и возачката дозвола, надевајќи се дека ќе му помогнат да најде работа.

Три недели по масовното пристигнување, стотици мигранти и натаму чекаат пред преполните прифатни центри, додека властите бараат дополнителни капацитети за нивно сместување.