Вооружени турски борбени авиони продолжиле со нарушување на грчкиот национален воздушен простор, а еден од инцидентите довел до симулирана воздушна борба меѓу два грчки Ф-16 и два турски Ф-16 во областа меѓу островите Лемнос и Лезбос.
Како што пренесува „Катимерини“, повикувајќи се на грчки официјални претставници, ова бил трет ваков инцидент од почетокот на 2026 година. Претходните случаи биле регистрирани на 26 март и на 12 мај.
Грчките власти соопштиле дека во понеделникот биле забележани 10 нарушувања на воздушниот простор.
Во тој период немало воени вежби во поширокиот североисточен дел на Егејското Море, бидејќи турската воена вежба „ЕФЕС 2026“ завршила на 22 мај.
Официјални лица во Атина анализираат дали последниот инцидент претставува враќање на претходната турска тактика или станува збор за изолиран израз на тензии.
Министерот за надворешни работи на Грција, Јоргос Герапетритис, одговарајќи на прашања во парламентот за доктрината „Сина татковина“, изјавил дека меѓународното право бара договор меѓу соседните држави за разграничување на ексклузивните економски зони.
„Едностраните потези немаат никакви правни последици, непотребни се и создаваат тензии“, изјавил Герапетритис.
