Европската унија подготвува нова програма за забрзување на развојот на воена технологија, со цел да го надмине заостанувањето во однос на глобалните конкуренти и да одговори на современите безбедносни закани.
Станува збор за програмата AGILE, која предвидува инвестиции од 115 милиони евра во технологии како вештачка интелигенција, дронови, роботика и квантно компјутерство. Намерата е иновациите многу побрзо да се пренесуваат од развој во практична употреба, за разлика од досегашните бавни процедури.
Програмата ќе финансира проекти кои се веќе во напредна фаза, со цел тие да бидат оперативни во рок од една до три години. Предност ќе имаат стартапи и мали компании, а финансирањето може да покрие до 100 проценти од трошоците.
Потребата од ваков пристап произлегува од брзината на технолошките промени во современите конфликти, каде дронови и системи базирани на вештачка интелигенција се развиваат и применуваат за неколку недели, додека европските процедури често траат со години.
И покрај значителните инвестиции во одбранбени фондови, ЕУ и натаму заостанува зад САД и Кина во вложувањата во истражување и развој, што дополнително ја нагласува потребата од побрзи и пофлексибилни механизми за финансирање.
