Генералниот директор на Меѓународна агенција за атомска енергија, Рафаел Гроси, изјави дека засега нема индикации дека биле оштетени иранските нуклеарни постројки по неодамнешните американски и израелски напади.
Во обраќање пред Управниот одбор на агенцијата, Гроси нагласи дека нема докази оти биле погодени „нуклеарните инсталации, вклучително и нуклеарната електрана Бушер, истражувачкиот реактор во Техеран или други објекти од нуклеарниот горивен циклус“. Тој посочи дека ИАЕА се обидува да стапи во контакт со иранските регулаторни власти во нуклеарната сфера, но дека „досега нема одговор“.
Гроси повика на „најголема можна воздржаност во сите воени операции“, имајќи ги предвид нуклеарните објекти во Иран и во други земји од регионот, меѓу кои Бахреин, Ирак, Кувајт, Оман, Катар и Саудиска Арабија. Според него, секое воено дејствување во близина на такви постројки носи сериозен ризик од пошироки последици.
Во меѓувреме, иранскиот амбасадор при ИАЕА, Реза Наџафи, за Би-Би-Си изјави дека во неделата бил погоден нуклеарниот комплекс во Натанз, но не изнесе дополнителни детали за евентуалната штета или последици. Официјална потврда за обемот на евентуалните оштетувања засега нема, што дополнително ја зголемува неизвесноста околу состојбата на теренот.
