Институтот за јавно здравје (ИЈЗ) издаде вонредни препораки до населението поради зголеменото загадување на воздухот предизвикано од активните пожари ширум државата. Граѓаните кои се наоѓаат во подрачја погодени од чад и дим се повикуваат веднаш да ги исклучат климатизерите и вентилационите системи што внесуваат воздух однадвор.
Препораките доаѓаат откако, според информациите на Центарот за управување со кризи (ЦУК), до 13 часот денеска биле регистрирани вкупно 14 пожари на отворен простор, од кои 10 сè уште се активни. Најмногу чад се чувствува во неколку скопски општини, каде ситуацијата дополнително се влошува поради силен ветер што ја шири прашината и отпадот.
ИЈЗ апелира граѓаните да ги држат прозорците и вратите затворени, да останат во затворени простории со минимален контакт со надворешниот воздух, и да ги следат следните препораки:
• Да се запечатат сите процепи околу прозорците и вратите со влажни крпи или самолеплива лента;
• Да се користи заштитна маска од типот FFP2, FFP3, N95 или специјални противгасни маски;
• Во недостаток на маска, носот и устата да се прекријат со влажна крпа (привремена заштита);
• Најзагрозените категории – деца, постари лица, бремени жени и лица со хронични болести – да не излегуваат од затворени простории;
• При симптоми како што се отежнато дишење, кашлица или вртоглавица, веднаш да се побара медицинска помош;
• Да се подготви торба за евакуација со основни документи, лекови, вода, храна и заштитна опрема.
Институтот предупредува дека изложеноста на чад и токсични честички може да има сериозни последици врз здравјето, особено кај ранливите категории. Надлежните институции апелираат на будност и строго придржување до препораките.
