Северна Кореја со голема воена парада во Пјонгјанг ја одбележа 80-годишнината од основањето на Работничката партија, при што лидерот Ким Џонг Ун се пофали со ново, „најмоќно оружје досега“.
Десетици илјади војници маршираа низ главниот град, демонстрирајќи го огромниот арсенал на оружје со кој располагаат севернокорејските вооружени сили. Парадата се одржа на 10 октомври 2025 година, а до Ким на трибината стоеја кинескиот премиер Ли Ќианг и поранешниот руски претседател Дмитриј Медведев.
Пријателите се заедно, непријателите стануваат нервозни“, напиша Медведев на новата руска платформа „Макс“, пренесува Дојче веле.
Настанот уште еднаш ја потврди зајакнатата позиција и влијание на севернокорејскиот лидер. Никогаш досега, откако пред речиси 14 години го наследи својот татко Ким Џонг Ил, 41-годишниот Ким не уживал толкава контрола и значење на меѓународната сцена.
Во септември, тој за првпат се појави рамо до рамо со кинескиот претседател Си Џинпинг и рускиот претседател Владимир Путин на воена парада во Пекинг.
Ким рамо до рамо со најмоќните автократи во светот – вакво инсценирање на стратешки сојуз досега не е видено, оценува германскиот весник Франкфуртер алгемајне цајтунг.
