Дел од булеварот „Македонија“ во Скопје од раните утрински часови е целосно затворен за сообраќај поради градежни активности во рамки на реконструкцијата.
Станува збор за потегот од Стара Рампа во Кисела Вода до семафорите кај Црвениот Крст, каде се изведува поставување на завршен слој на коловозот во првата фаза од проектот.
Од Град Скопје апелираат до граѓаните за разбирање и внимателно учество во сообраќајот.
„Ги замолуваме сите учесници во сообраќајот за разбирање и трпение, како и за почитување на поставената сообраќајна сигнализација и користење на алтернативните сообраќајни правци“, информираат од Градот.
Според надлежните, со реализацијата на оваа фаза се очекува подобрување на проточноста и намалување на метежот, како и зголемување на безбедноста на сообраќајот.
Од Град Скопје додаваат дека со целосната реализација на проектот, главниот град ќе ја добие и првата подземна сообраќајница, што се оценува како значаен инфраструктурен чекор за модернизација на сообраќајот.
