ПРИСЛУШУВАЊЕ

Кинески хакери со години ги прислушувале мобилните телефони на британски функционери

Кинески државни хакери со години имале пристап до мобилните телефони на високи функционери на британската влада во Даунинг стрит, открива британскиот весник „Телеграф“, повикувајќи се на извори запознаени со истрагата. Според објавените информации, станува збор за сериозна шпионска операција што значително ја загрозила безбедноста на британската влада и му овозможила на Пекинг увид во приватните комуникации на највисоките државни претставници.Како што наведува весникот, мета на нападите биле блиски соработници на поранешните премиери Борис Џонсон, Лиз Трас и Риши Сунак, во периодот од 2021 до 2024 година. Иако засега нема потврда дека мобилните телефони на самите премиери биле компромитирани, извор близок до истрагата предупредува дека упадот одел „директно во срцето на Даунинг стрит“.Американски разузнавачки извори информирале дека кинеската сајбер-шпионска операција, позната под името „Солт тајфун“, и натаму е активна, што отвора можност и актуелниот британски премиер Кир Стармер, како и неговите најблиски соработници, да биле изложени на прислушување. Откривањето на аферата доаѓа во чувствителен политички момент, во пресрет на најавената посета на Стармер на Кина, прва посета на британски премиер на таа земја од 2018 година, чија цел е зајакнување на трговските и инвестициските односи.Безбедносни извори наведуваат дека хакерите имале можност да читаат пораки, да прислушуваат телефонски разговори или, во најмала рака, да прибираат метаподатоци, односно информации за тоа кој со кого комуницирал, колку често и од која локација. Поранешната заменик-советничка за национална безбедност на САД, Ен Њобергер, изјавила дека хакерите можеле „по сопствена волја да снимаат телефонски разговори“.Нападите врз Даунинг стрит биле дел од поширока глобална шпионска операција насочена и кон Соединетите Американски Држави, како и кон останатите членки на разузнавачкиот сојуз „Пет очи“ – Австралија, Канада и Нов Зеланд. Иако упадите започнале уште во 2021 година, разузнавачките служби ги откриле дури во текот на 2024 година.Кинеското Министерство за надворешни работи претходно ги отфрли обвинувањата, оценувајќи ги како неосновани и без докази. Британските власти, пак, тврдат дека домашните телекомуникациски мрежи се подобро заштитени благодарение на Законот за безбедност на телекомуникациите од 2021 година, но еден висок американски функционер оцени дека станува збор за „една од најуспешните шпионски кампањи во историјата“.

Свет | пред 2 месеци

ВМРО-ДПМНЕ бара ЈО да отвори темелна истрага за прислушувањето на Мицкоски

ВМРО-ДПМНЕ побара Јавното обвинителство да отвори темелна и транспарентна истрага за случајот со, како што наведуваат, незаконското следење и прислушување на претседателот на партијата Христијан Мицкоски, како и на функционери, новинари и бизнисмени.Од партијата тврдат дека граѓаните пет години живееле во „заробена држава“ во која се прекршувале основните човекови права, а во тој период Мицкоски и десетици други лица биле предмет на незаконски активности на безбедносните служби под контрола на СДС.Во соопштението се обвинува дека во изминатите пет години СДС и ДУИ грубо ги прекршувале законите и ги злоупотребувале институциите, додека Агенцијата за национална безбедност (АНБ) и Армијата на Република Северна Македонија (АР) биле ставени „во служба на политичката мафија“.ВМРО-ДПМНЕ наведува и дека Јавното обвинителство, заедно со обвинителот Љупчо Коцевски, дејствувале во интерес на СДС и ДУИ и прикривале криминал.„Неопходно е ЈО да престане да ги штити антидемократските структури и да започне да работи во интерес на владеењето на правото и правдата, со цел враќање на довербата во институциите“, стои во соопштението.Според ВМРО-ДПМНЕ, довербата на граѓаните во правосудството изнесува само 2 проценти, а доколку нема конкретни резултати, таа ќе падне на нула.Партијата бара ЈО да даде одговор кој стои зад наредбите на АНБ и АР и кој е дел од, како што велат, „мрежата на незаконско следење“.

Македонија | пред 6 месеци

Николоски: СДС преку тајните служби креираа мастер план во три чекори да се забрани политичкото дејствување на ВМРО-ДПМНЕ

Мастер план во три чекори е криериран од поранешното раководство на СДС преку злоупотреба на безбедносните служби се со цел да се забрани политичко дејствување на ВМРО-ДПМНЕ. Јас тие детали прв ги презентирав во 2019 година во еден ТВ дуел со Радмила Шеќеринска, каде јавно кажав дека имаме сериозни индиции за злоупотреба на безбедноснитеслужби, истакна потпретседателот на ВМРО-ДПМНЕ Александар Николоски во вечерашното гостување во емисијата “Заспиј ако можеш”.“Целта на тој мастер план беше да се забрани политичко дејствување на ВМРО-ДПМНЕ. Имаше три чекори. Првиот беше да се притворат што повеќе пратеници на ВМРО-ДПМНЕ со цел да се случи промена на името, и тоа се случи. Вториот беше партијата да се стави на обвинителна клупа за терористичко дејствување и нелегално финансирање и делумно успееја во тој дел за нелегално финанисрање. Ја ставија на обвинителна клупа и се уште партијата е на обвинителна клупа, се уште имаме замрзнат имот. Третиот дел беше доколку успеат да ја осудат ВМРО-ДПМНЕ согласно закон, да се забрани политичко дејствување и воопшто да не може да учествуваме на избори.Овој мастер план одеше дотаму да се забрани и на раководството на ВМРО-ДПМНЕ да се бави со политичко дејствување. И ова беше смислено од тогашното раководство на СДС на чело со Зоран Заев и Радмила Шеќеринска, а не може да се амнестира ниту Димитар Ковачевски”- вели Николоски.Агенцијата за безбедност до толку била злоупотребувана што секојдневно правеле лажни извештаи за раководството на ВМРО-ДПМНЕ дека сме биле анти -западни и анти – НАТО, додаде Николоски.“ Од тој план беше злоупотребена Агенцијата, во контекс Ние да бидеме оцрнети пред стратешките партнери, пред се после членството во НАТО. Целта беше никој од нас да не може да добие безбедносен сертификат. Не им успеа во тоа, но се штанцале на дневна основа извештаи дека сме биле под вакво влијание или под такво влијание. Еве прв пат ќе кажам за мене дека сум бил под иранско-турско-унгарско влијание. На врвот на тие лажни извештаи според мои сознанија биле на удар и претседателот Мицкоски, Драган Ковачки, Антонио Молошоски, Владо Мисајлоски. За мене составувале белешки дека сум била анти-западен и анти-НАТО во услови кога бев потпретседател на Парламентарното Собрание на Совет на Европа, во услови кога бев шеф на мониторинг мисија што ги создаваше Советот на Европа и во услови кога Пријатели на Европа ме избраа во 2022 година во 40 највијателни личности под 40 години во Европа”.Оваa битка е праведна бидејќи оваа биткa е на демократско ВМРО-ДПМНЕ и антидемократските структури кои не сакаат демократија во Македонија. Тоа нема да го дозволиме, дециден е Николоски.“Ако во 2025 година некој очекува дека ова ќе се заборави, тоа е многу наивно. Два пати ВМРО-ДПМНЕ паѓале од власт од службите и 2002 како последица на Големото уво и 2016-2017 преку прислушкуваните разговори. Ако истите тие луѓе мислат дека сме наивни и ќе ја оставиме работата по трет пат да не симнат од власт на недемократски начин, тогаш сериозно не потцениле. Еднаш за секогаш ќе расчистиме за да не ни се случи пак”- потенцираше потпретседатеот Николоски.Тој најави бескорпулозна борба за правда, против сите структури кои ги злоупотребувале тајните служни. Ги повика Обвинителството и судовите да не ги штитат структурите од претходната власт и да ја изведат правдата пред целата јавност.

Македонија | пред 6 месеци

Петрушевски: СДС пет години ги прислушувале Мицкоски, новинари и бизнисмени

Пратеникот на ВМРО-ДПМНЕ, Бране Петрушевски, денеска на прес-конференција обвини дека СДС признале дека вршеле прислушување и следење преку Агенцијата за национална безбедност (АНБ) и Агенцијата за разузнавање (АР).„СДС најпрво треба да се извини за пет години следење на претседателот Мицкоски, новинари и бизнисмени, кои заедно со нивните семејства биле под константна присмотра на службите. Откако ќе се извинат, треба да го повикаат Виктор Димовски, Еролд Муслиу и Љупчо Коцевски на одговорност,“ рече Петрушевски.Тој нагласи дека наместо тоа, СДС „од петни жили ги штити сите кои ги злоупотребувале институциите, затоа што работеле по партиска задача“.„Јавното обвинителство не смее со денови да молчи и да не презема никаква акција. Загрозена била приватноста на голем број луѓе цели пет години. Службите влегле во нивните животи со цел да го забават падот на СДС од власт, да го продолжат нивното владеење и да прават криминал“, изјави Петрушевски.Тој додаде дека доколку ЈО и обвинителот Љупчо Коцевски останат „неми посматрачи“, мора да знаат дека тоа нема долго да трае и дека и тие ќе сносат одговорност.

Македонија | пред 6 месеци

„Ајде разбирам јас, ама децата?“ Мицкоски за прислушуваните материјали

Премиерот Христијан Мицкоски, се осврна и на скандалот со прислушувањето, нагласувајќи дека од 90-тите години постои иста структура и исти луѓе блиски до мината власт кои го злоупотребуваат системот.„Со ваквите чекори се удира по основите на демократијата, по уставниот поредок, а последиците не само што уништуваат генерации луѓе, туку ја доведуваат во опасност целата држава“, рече Мицкоски, додавајќи дека ваквите практики уништуваат човечки судбини измислувајќи ситуации и контакти кои во суштина не постојат.Тој нагласи дека не е суштинско прашање дали материјалите ќе бидат декласифицирани, туку како да се спречат злоупотребите и тие повеќе да не се повторат. „За ова сум сведок и јас лично, гледајќи го материјалот поврзан со мене, а богами и со моето семејство. Ајде разбирам јас, ама децата?!“, изјави премиерот.Мицкоски истакна дека сите материјали и сознанија за незаконското следење се предадени на обвинителството и дека случајот внимателно ќе се следи. „Одговорност мора да има. Ова е прашање на опстојување на државата, и во периодот што следи ќе се одмотува овој гордиев јазол“, порача тој.

Македонија | пред 6 месеци

Скандалот со прислушкувањето е многу сериозен и се граничи со државен удар, вели Стојаноски

Пратеникот од ВМРО-ДПМНЕ, Бојан Стојаноски, во гостувањето во телевизиско гостување изјави дека аферата со прислушкувањето на политичари, новинари и бизнисмени претставува еден од најсериозните скандали во земјата и „се граничи со државен удар“.„Агенцијата за национална безбедност и Агенцијата за разузнавање во периодот од пет години, меѓу 2019 и 2024, злоупотребувале државни ресурси за оперативно следење и обработка на лидерот на опозицијата, на новинари, на медиуми и на бизнисмени. Ако тоа се прави без дозвола од обвинителството, тогаш тоа не е само скандал туку и државен удар“, изјави Стојаноски.Тој додаде дека Јавното обвинителство одбива да даде информации дали ќе отвори предмет и побара одговорност за сите кои учествувале во, како што го нарече, „злоупотреба на ресурсите на државниот систем“.„Треба да се одговори на неколку клучни прашања – кој ја дал наредбата за следење, зошто токму тие лица биле избрани, каде завршувале информациите и која била целта на наредбодавачот. Ова е еден од најсериозните скандали во режија на разузнавачките служби во државата“, потенцираше Стојаноски.

Македонија | пред 6 месеци

Си прават зажани-откажи: Аферата со прислушување ја тресе државата, Собранието не успева да одржи седница

Во Собранието веќе неколку дена се одложува седницата на Комисијата за надзор над работата на Агенцијата за национална безбедност (АНБ) и Агенцијата за разузнавање, закажана по аферата со прислушувањето и следењето на премиерот Христијан Мицкоски, обвинителката Вилма Русковска, новинарите Кристијан Ландов и Љупчо Златев, повеќе редакции и бизнисмени.Првпат седница била закажана за вчера во 11 часот: „Третата седница на Комисија за надзор над работата на Агенцијата за национална безбедност и на Агенцијата за разузнавање е закажана за 05 септември 2025 (петок) во 11:00 часот, во Сала 6“.Исто вчера, била одложена: „Третата седница на Комисија за надзор над работата на Агенцијата за национална безбедност и на Агенцијата за разузнавање е одложена“.Повторно вчера била закажана седница: „Четвртата седница на Комисија за надзор над работата на Агенцијата за национална безбедност и на Агенцијата за разузнавање е закажана за 10 септември 2025 (среда) во 11:00 часот, во Сала 6“, па одложена.Истото се повторило: „Петтата седница на Комисија за надзор над работата на Агенцијата за национална безбедност и на Агенцијата за разузнавање е закажана за 05 септември 2025 (петок) во 17:00 часот, во Сала 6“. Ни од оваа седница ништо, бидејќи до пратениците стигнала порака дека се одлага. Добиле нова најава, овојат за седница во среда.„Четвртата седница на Комисија за надзор над работата на Агенцијата за национална безбедност и на Агенцијата за разузнавање е презакажана за 10 септември 2025 (среда) во 10:00 часот, во Сала 6“, стои во пораката.Закажување на седница прави претседателот на Комисијата за надзор над работата на Агенцијата за национална безбедност и на Агенцијата за разузнавање Скендер Реџепи денеска. Тој нема ниту безбедносен сертификат за да може да раководи со оваа комисија. Прашан за тоа како сака да раководи со седница а без безбедносен сертификат, раскажа дека моделот во Македонија треба да е како во Словенија, сертификат да се добива со добивање на мандат за пратнеик.

Македонија | пред 6 месеци

Кој го прислушкувал Мицкоски и по чија наредба?, прашува ВМРО-ДПМНЕ и бара истрага

ВМРО-ДПМНЕ побара итна истрага за, како што го нарекуваат, најголемиот скандал со прислушкување и следење на претседателот на партијата Христијан Мицкоски. Од партијата обвинуваат дека Јавното обвинителство и неговиот прв човек Љупчо Коцевски со денови молчат и не преземаат ништо по објавените информации.„Јавното обвинителство досега веќе требаше да отвори истрага за да ги истражи сите наводи за скандалозното следење на Мицкоски, новинари и бизнисмени од страна на безбедносните служби во времето на владеење на СДС“, велат од ВМРО-ДПМНЕ.Според опозициската партија, молкот на обвинителството и на Коцевски отвора сомнежи дека тој знаел за активностите, бидејќи во истиот период бил задолжен за следење на издавањето на посебни истражни мерки.„СДС ги вплетка не само службите, туку и јавното обвинителство во својата шема за опстанок на власт. Потребна е итна истражна постапка која ќе ја открие вистината и ќе ги идентификува сите инволвирани – од извршителите и помагачите, до оние кои ја дале наредбата“, порачуваат од ВМРО-ДПМНЕ, додавајќи дека одговорност мора да има и за извршителите и за наредбодавците.

Македонија | пред 6 месеци

ВМРО-ДПМНЕ бара итна седница на Комисијата за надзор на АНБ

ВМРО-ДПМНЕ соопшти дека бара уште веднаш да се свика седница на Комисијата за надзор на АНБ, а веќе следниот работен ден – во вторник во 09 часот – да се изврши увид во просториите на Агенцијата за национална безбедност.Партијата оцени дека СДС „докажува“ оти го следел Христијан Мицкоски, откако, како што наведуваат, „се излетаа“ на прес-конференција.Во однос на одложената седница, ВМРО-ДПМНЕ упати порака до СДС „причината да ја побараат кај нивните коалициони партнери“ – Скендер Реџепи и ДУИ.

Македонија | пред 6 месеци

„Вистината за случајот АНБ, дали Мицкоски се плаши од декласификација поради потврда на милионски криминал на ВМРО-ДПМНЕ?“, праша пак СДСМ

На денешната прес-конференција, портпаролката на СДСМ, Богданка Кузеска, побара од премиерот Христијан Мицкоски и директорот на АНБ, Бојан Христовски, веднаш да ја започнат процедурата за декласификација на документите поврзани со аферата за наводно прислушкување.„Вистината за случајот АНБ: Дали Мицкоски се плаши од декласификација поради потврда на милионски криминал на ВМРО-ДПМНЕ? Зошто после речиси една недела од објавувањето на наводите за следење на Христијан Мицкоски ниту директорот на АНБ, Бојан Христовски, ниту премиерот Христијан Мицкоски не ја отпочнаа процедурата за декласификација на документите кои би ги докажале наводите на власта? Зошто самиот тој не побара декласификација на документацијата од Агенцијата за национална безбедност во која наводно бил следен? Од што се плаши Христијан Мицкоски?Дали можеби Мицкоски се плаши од декласификација на овие документи затоа што ќе ги потврдат индициите за милионски криминал во случајот со т.н. „Делчевски ниви“? Да ја потсетиме јавноста дека во случајот „Делчевски ниви“ беа инволвирани најблиските соработници на Мицкоски меѓу кои член на неговото лично обезбедување како и тогашниот директор на Белата палата, односно Централниот штаб на ВМРО-ДПМНЕ. Дали овие документи кои Мицкоски одбива да ги декласифицира покажуваат дека шефот на организираната криминална група која се стекнала со корист во илјадници евра е токму Христијан Мицкоски? Дали во овие документи има сериозни индиции за повторно нелегало финансирање на ВМРО-ДПМНЕ како и индиции за организиран криминал и корупција? Постапката за декласификација на овие документи е едноставна и би ги разрешила сите дилеми кои ги има во јавноста. Одбивањето на декласификација на овие документи ќе биде доказ дека Мицкоски како тогаш така и денес не може да излезе од криминалната матрица и негова единстгвена цел е личното богатење“., изјави Богданка Кузеска, портпаролка на СДСМ.

Македонија | пред 6 месеци

СДСМ најави објавување на „Вистината за случајот АНБ“

СДСМ соопшти дека започнува со објавување на „Вистината за случајот АНБ“, прашувајќи зошто власта, и по речиси една недела од изнесувањето на наводите за незаконско следење, сè уште не ја започнала процедурата за декласификација на документите.„Зошто самиот Мицкоски не побара декласификација на документацијата од Агенцијата за национална безбедност во која наводно бил следен? Кои се причините и што се крие зад бегањето на власта од декласификацијата на документите?“, наведуваат од СДСМ.Од партијата информираат дека денеска, со почеток во 10:30 часот, ќе се одржи прес-конференција на која ќе се обрати портпаролката Богданка Кузеска.

Македонија | пред 6 месеци

Петровска: АНБ веднаш може да ја декласифицира документацијата, законот е јасен

Пратеничката на СДСМ, Славјанка Петровска, денеска порача дека е неопходна итна декласификација на целата документација поврзана со случајот во Агенцијата за национална безбедност (АНБ), кој, како што рече, власта се обидува да го претстави како скандал.„Декласификацијата е чекор кон вистината, а не кон манипулацијата. Таа ќе ги даде одговорите на прашањата кои изминативе денови се отворија, а власта одбегнува да ги даде криејќи се зад класифицирани документи,“ истакна Петровска.Таа потсети дека за декласификација не е потребна судска постапка, спротивно на тврдењата од АНБ. „Законот за класифицирани информации јасно вели – оној што класифицира, тој и декласифицира. Според член 14, промена на степенот на класификацијата врши создавачот. Дополнително, член 20 предвидува дека информација со класификација не се смета за класифицирана ако со неа се прикрива кривично дело, злоупотреба на функцијата или друг незаконски акт. Ако власта тврди дека имало незаконско работење, тогаш овој член овозможува веднаш, без одлагање, да се направи декласификација,“ објасни Петровска.Како втор чекор таа го посочи итното свикување на Комисијата за надзор над работата на АНБ. „Пратениците кои сме дел од Комисијата мораме да извршиме увид во документацијата што ќе биде декласифицирана и потоа да ја информираме јавноста. Со тоа ќе се надмине и пречката околу безбедносниот сертификат на претседателот на Комисијата. Со ваков пристап брзо ќе се расчисти маглата која ДПМНЕ ја пушта за да ги покрие досегашните скандали и да создаде алиби за идејата за спојување на АНБ и АР,“ рече таа.Во однос на случајот, и ВМРО-ДПМНЕ вчера побара итно да се закаже седница на собраниската Комисија за надзор на работата на АНБ и АР, по информациите за незаконско прислушување во периодот од 2019 до 2024 година.Пратеникот Љупчо Пренџов, член на Комисијата, побара од претседателот Скендер Реџепи да закаже седница на која ќе се утврди термин за официјална посета на АНБ и детално разгледување на состојбата. Но, Реџепи одби да свика седница со образложение дека е дискриминиран и дека не може да учествува, бидејќи сè уште нема добиено безбедносен сертификат, за кој поднел барање кон крајот на минатата година.

Македонија | пред 6 месеци

СДСМ: Христовски го демантираше Мицкоски дека бил прислушуван

СДСМ реагира на тврдењата за наводно прислушкување на премиерот Христијан Мицкоски и побара Агенцијата за национална безбедност (АНБ) веднаш да ја декласифицира целата документација поврзана со случајот.„Власта да не бега од вистината, АНБ веднаш да направи декласификација на целата документација поврзана со случајот кој се обиде да го претстави како наводна афера за прислушкување,“ се наведува во соопштението.Од СДСМ истакнуваат дека не е точно дека е потребна судска постапка за декласификација на документите, туку тоа е само алиби и параван зад кој, како што велат, се крие вистинската намера на власта.„Законот е јасен – ‘тој што класифицира, тој и декласифицира’. Во овој случај тоа е АНБ и тоа треба да се направи веднаш,“ додаваат од партијата.СДСМ обвинува дека се фрлаат обвинувања во јавноста без ниту еден доказ и факти, со што се поткопува довербата во тоа што го кажува власта, а се создаваат сериозни сомнежи за „намерна манипулација и опасна игра на ВМРО-ДПМНЕ“.„Како тоа премиерот Мицкоски тврди дека наводно бил прислушуван, а директорот на АНБ Христовски кажува друго – дека станува збор за прибирање информации за таргетирани лица. Некој тука лаже свесно,“ се наведува во реакцијата.Од СДСМ додаваат дека само преку декласификација јавноста ќе ја види реалноста – дали и кој правел злоупотреби. „Ако не се направи декласификација, власта ќе потврди дека целиот случај е креиран заради политички мотиви и злоупотреба на агенцијата во партиски цели на ВМРО-ДПМНЕ,“ стои во соопштението.

Македонија | пред 6 месеци

ВМРО-ДПМНЕ: Пет години безбедносните служби го прислушкувале Мицкоски по налог на Заев и Филипче

СДС не бирале средства и методи за да останат на власт што е можно подолго, злоупотребувајќи институции, државни ресурси и целиот безбедносно-разузнавачки апарат, обвини и денеска ВМРО-ДПМНЕ.Од партијата велат дека заради одржување на власта, безбедносните служби биле ставени во партиска функција со цел следење и прислушкување на политички противници, бизнисмени, новинари и јавни личности.Според соопштението, во периодот кога СДС била најголема опозициска партија, со помош на нивни кадри поставени во агенциите за разузнавање и безбедност, пет години бил следен и прислушкуван претседателот на ВМРО-ДПМНЕ, Христијан Мицкоски.„Тоа го правеле со единствена цел политичка елиминација на Мицкоски, како единствен којшто може да им се спротивстави и да ги победи на избори, нешто што и се случи и покрај недемократските, да не речеме тоталитарни, мерки,“ се наведува во реакцијата.Од партијата додаваат дека со следењата и прислушкувањата СДС сакале да го запрат нивниот пад од власт, да го придушат секој слободен и критички глас од новинари и јавни личности, како и да вршат уцени врз стопанственици.„Во периодот од 2019 до 2024 година, СДС владееле со злоупотреба на службите како да се партиска алатка за останување на власт. Трагично е да се гледаат СДС, кои од уста не ја вадеа демократијата, како ги злоупотребувале службите и со најнедемократските методи ги ограничувале правата на слободно движење и изразување на граѓаните загарантирани со Устав и закон,“ стои во соопштението.ВМРО-ДПМНЕ наведува дека цели пет години службите биле користени за да се одржат на власт Зоран Заев и Венко Филипче и кликата околу нив, наместо за безбедноста на државата и граѓаните.Дополнително, како што посочуваат, асистенција во тоа давал и сегашниот главен обвинител Љупчо Коцевски, кој бил одговорен за издавање на ПИ мерките и претставувал „главна алка“ во синџирот на СДС за следење и прислушкување на претседателот Мицкоски, новинари и бизнисмени.„Тоа е истиот тој Коцевски кого СДС толку силно го бранеа во Собрание за време на гласањето на интерпелацијата против него, а веќе се гледа зошто го бранеа и не гласаа за негово разрешување,“ додаваат од партијата.Во заклучок, ВМРО-ДПМНЕ бара и очекува Јавното обвинителство да отвори сеопфатна истрага за овој скандал „од невидени размери“, со која ќе бидат опфатени сите што ги злоупотребиле институциите и ќе бидат изведени пред лицето на правдата.

Македонија | пред 6 месеци

Дали Спасовски мета на АНБ додека ја воделе „неговите“: Вистината мора да биде јавно објавена!

И ексминистерот за внатрешни работи, Оливер Спасовски е ставен на списокот на лица кои биле обработувани од страна на Агенцијата за национална безбедност. Неговото име го објави порталот „Мкд.мк“ и е прв споделен во јавноста од редот на СДСМ, по аферата која беше пласирана. Непознато е како биле обработувани, а медиумот посочува „Вилма Русковска и Оливер Спасовски, тогашниот министер за внатрешни работи, биле предмет на обработка затоа што преземале некакви активности во рамките на нивните надлежности против Фросина Ременска, сопругата на Јовче Ременски од АНБ“.Спасовски пак, без конкретен став дали се сомнева во тоа дека бил таргет на нелегално следење на комуникациите, како и дали има информација дека бил цел на оперативно-технички обработки. Тој очекува одговорот да го добие со декласификација на целата документација.„Очекувам итна декласификација на целата документација за овој случај. Постои постапка согласно која АНБ може да ги обелодени сите информации и сите документи. Вистината мора да биде целосно достапна на јавноста и мора низ една транспарентна, законска постапка да се утврди дали и кој направи злоупотреби, и секако да се бара одговорност. Конечно мора да се застане на патот на оние кои злоупотребуваат, а службите да бидат заштитник на уставниот поредок на државата и на граѓаните“, вели актуелниот пратеник, Оливер Спасовски.Претходно, во јавноста беше пласирано дека нелегално прислушувани и предмет на оперативно-техничка обработка биле премиерот Христијан Мицкоски, обвинителката Вилма Русковска, новинарите Кристијан Ландив и Љупчо Златев. Потврда нема за ниту едно објавено име, освен за премиерот Мицкоски, кој самиот кажа дека документите покажувале негово нелегално следење.

Македонија | пред 6 месеци

Филипче: СДСМ бара итна декласификација на документите од случајот со АНБ

СДСМ бара итна декласификација на целата документација од случајот кој власта во јавноста го презентираше како афера за прислушкување, наведува претседателот на СДСМ, д-р Венко Филипче.„СДСМ бара итна декласификација на целата документација од случајот кој власта во јавноста го презентираше како афера за прислушкување.За ова има јасна постапка по која АНБ може да ги обелодени сите информации и документи. Случајот треба да биде достапен на јавноста за да се суди дали и кој ја злоупотребил функцијата во службите за безбедност.Доколку АНБ ова не го направи, ќе биде јасно дека ова ќе биде уште еден неуспешен обид за манипулација. Исто како што беа случаите за неколку дестабилизации, за следење со дронови, за обиди за поткуп од странски компании на премиерот и слични приказни за кои никогаш ништо не се дозна ништо повеќе.ВМРО-ДПМНЕ си игра со безбедносниот апарат и го користи за дневна политика исто како што тоа го прави со сите други сериозни национални прашања.Ова е одлика на инфантилни политичари и популистички партии, чиј единствен интерес е како да го оттргнат вниманието од проблемите со кои се соочуваат граѓаните.Добро е што веќе никој не им верува на овие потрошени стратегии од времето на Никола Груевски, кои сега се рециклираат во услови кога Владата нема никаков резултат.“ стои во објавата.

Македонија | пред 6 месеци

АНБ служи за политички пресметки, државата изорана од странски служби, вели Пешевски

Адвокатот Драган Пешевски остро ја критикуваше работата на Агенцијата за национална безбедност (АНБ), оценувајќи дека институцијата не ја извршува својата примарна улога – заштита на државата.„Агенцијата за национална безбедност не се грижи за безбедноста на државата (исто и претходникот ДБК) туку служи за политичките пресметки меѓу куртовци и муртовци, трошејќи наши, државни пари, а во меѓувреме како држава сме изорани од странски разузнавачки служби. Не е ни чудо што сме на нивото кое сме, ако може да се карактеризира како некакво си ‘ниво’“, напиша Пешевски.Ова доаѓа по најновите информации за нелегално, незаконско, неетичко следење и прислушување на премиерот Христијан Мицкоски, разрешената обвинителка Вилма Русковска, новинарите Кристијан Ландов и Љупчо Златев.

Коментари | пред 6 месеци

Имам впечаток дека само се нафрлаат работи во јавноста за да се направи фама, вели Филипче за наводите за прислушувањето и следењето

Лидерот на СДСМ, Венко Филипче, реагираше на наводите за незаконско следење и прислушување на премиерот Христијан Мицкоски, поранешната обвинителка Вилма Русковска и новинарите Кристијан Ландов и Љупчо Златев.„Нека се декласифицираат информациите. Во АНБ, во наше време, направивме сериозни реформи. Јас сум за да Обвинителство направи буквално сѐ, како и ние како пратениците и да се дознае вистината за овој случај. Имам впечаток дека само се нафрлаат работи во јавноста за да се направи фама. Нека се расчисти овој случај, јавноста заслужува“, изјави Филипче.Тој додаде дека лично има доверба во ексдиректорот на АНБ, Виктор Димовски: „Јас лично му верувам на Виктор Димовски. Но едно е моето мислење, друго е институциите“.Изјавата на Филипче доаѓа во момент кога прашањето за прислушкувањата ја отвора една од најголемите политички и институционални афери последниве години.

Македонија | пред 6 месеци

Прислушувањето на АНБ не е удар врз мене и новинарите, туку врз демократијата, вели Мицкоски

Премиерот Христијан Мицкоски денеска на отворањето на состанокот посветен на партнерството за отворена власт порача дека најновите информации за незаконско прислушување не се личен напад врз него, туку директен удар врз демократијата и правото на слобода.„Јас лично, тогаш како претседател на опозицијата, а денеска како премиер, заедно со новинари, медиуми, бизнисмени и јавни личности сме биле жртва на системот кој ги следел своите граѓани. Ова не е напад само врз мене, туку врз демократијата, врз правото на слобода, врз темелите на државата“, изјави Мицкоски.Тој истакна дека злоупотребата на безбедносните служби нема да остане без одговорност и најави правна разрешница. „Нема да има селективна правда. Ќе има одговорност. Ќе има правна разрешница. Времето на недопирливи заврши“, порача премиерот.Мицкоски додаде дека партнерството за отворена власт е најсилниот одговор на ваквите злоупотреби, бидејќи, како што рече, „каде што има светлина, нема простор за сенки“.„Нашата визија е да изградиме држава со силни институции, модерна администрација и економија што расте, со општество што верува во демократијата. Македонија стои цврсто на патот на реформите, на европската интеграција и на борбата против корупцијата. И од тој пат назад нема“, нагласи премиерот.

Македонија | пред 6 месеци

Ексдиректорот на АНБ: Мицкоски не ни бил таргет, да се декласифицираат документите

Поранешниот директор на Агенцијата за национална безбедност (АНБ), Виктор Димовски, реагираше на обвинувањата изнесени од премиерот и актуелното раководство на Агенцијата за наводни злоупотреби на државните ресурси во периодот 2019–2024 година. Тој се осврна на тоа дека сегашниот премиер Христијан Мицкоски не бил таргет на агентите, но не искоментира ништо за следењето на јавната обвинителка Вилма Русковска и новинарите Кристијан Ландов и Љупчо Златев.„Одговорно тврдам дека тогашниот лидер на опозицијата, а сегашен премиер, во периодот од 2019 до 2022 година не бил предмет на посебен оперативен интерес на Агенцијата, не бил предмет на организирана оперативна работа, ниту пак бил таргет кон кого биле применувани какви било оперативно-технички мерки,“ изјави Димовски.Тој потврди дека во тој период АНБ спровела постапки за преиспитување на безбедносни сертификати, вклучително и за еден тогашен и сегашен пратеник, поради оддавање класифицирани информации, за што била поднесена кривична пријава.„Го повикувам директорот на Агенцијата веднаш и неодложно да ги декласифицира документите за наводни злоупотреби, особено тие што се однесуваат на прислушкување на тогашниот лидер на опозицијата. Македонската јавност има право да знае кој тоа предлагал, барал, одобрувал и кој ги извршувал наводните прислушкувања,“ порача Димовски.Тој нагласи дека очекува овојпат да нема изговори за „класифицирани информации“ и предупреди на опасноста од шпекулации со имиња на лица кои, според дел од медиумите, биле поврзувани со случајот. 

Македонија | пред 6 месеци

Чулев: Кога службите стануваат политичко оружје, страда демократијата

Поранешниот министер за внатрешни работи, Наќе Чулев, оценува дека безбедносно-разузнавачките служби системски биле злоупотребувани за политички цели. Тој предупредува дека незаконското следење и прислушување не е само удар врз поединци, туку врз демократијата и довербата во институциите.Кога службите стануваат политичко оружје, страда демократијата.Внатрешните истраги во Агенцијата за разузнавање и Агенцијата за национална безбедност, како и известувањата поднесени до ОЈО за грубо кршење на законот од страна на раководители и вработени во нив, недвосмислено укажуваат на СИСТЕМСКА злоупотреба на безбедносно-разузнавачките служби.Злоупотребата на државни ресурси за следење и прислушување на лидер на опозицијата и истакнати опозициски претставници, новинари, бизнисмени, обвинители, министер и кој ли уште не, не е изолиран инцидент и удар врз поединци, туку удар врз демократијата, слободата, владеењето на правото и довербата во институциите.На виделина излегоа и причините за мојата професионална дискредитација, но и дискредитацијата на други колеги, незаконското следење, клевети и координирана манипулативна кампања со цел елиминација на професионални кадри од безбедносниот систем, само поради идеолошки разлики.Уште од 2020 година, и покрај сите притисоци, измислени оперативни обработки и закани, во континуитет јавно предупредував и укажував на ризиците од незаконското постапување и злоупотребата на службите со цел демонизирање на опозицијата. Тука е и латентната колатерална штета, бидејќи манипулативните и лажни белешки не застануваат кај таргетираната личност, туку отруеното досие со години фрла сенка врз сопружници, браќа/сестри и деца – блокира работни места и сертификати, комплицира визи, работни дозволи и го лимитира пристапот до граѓански права, лепи стигма, го нарушува угледот и достоинството и на тој начин станува колективна казна.Денес, кога е евидентно дека ресурсите на службите брутално се злоупотребувале за политички, бизнис и лични интереси, повторно апелирам дека е неопходно да има целосна истрага, декласификација на дел од фабрикуваните материјали и санкционирање на нарачателите и извршителите.Ова е битка, но и можност да изградиме модерен, транспарентен и одговорен безбедносно-разузнавачки систем кој ќе ја штити државата и граѓаните, а не ќе се користи за прогон на политички неистомисленици.

Коментари | пред 6 месеци

Директорот на СОЗР: „Ќе се обидат да ги оправдаат прислушувањата, факт е дека државните механизми биле злоупотребувани“

Директорот на Службата за општи и заеднички работи при Владата, Ивица Томовски, реагираше по објавите за незаконско следење и прислушување во периодот од 2019 до 2024 година, истакнувајќи дека станува збор за скандал од невидени размери.„Прислушкувани биле сегашниот премиер Мицкоски, следени биле новинари, медиуми, бизнисмени. Скандал кој е од невидени размери. А ќе потсетам дека на власт дојдоа со проект ‘Вистината за Македонија’. Седум години подоцна вистината е поинаква, грда, но и болна. Тогашната власт ја следела опозицијата,“ напиша Томовски.Тој смета дека тогашните власти ќе се обидат да ги оправдаат постапките со „белешки, фабрикувани случаи и измислени причини“, а суштината е дека државните механизми биле злоупотребувани за лични интереси.„Главните прашања кои мора да бидат одговорени се: кој бил одговорен да го следи издавањето на ПИМ мерките од 2019 до 2024 година? Дали е впрочем за тоа одговорен сегашниот јавен обвинител Љупчо Коцевски? Ако тоа е така, станува појасно зошто СДС и ДУИ не гласаа за негово разрешување. Уште поважно е што и денес Венко Филипче е опкружен со истите луѓе кои прислушкувале и злоупотребувале државен систем,“ додава Томовски.Тој бара одговори за тоа кому и зошто му служеле прислушуваните материјали и дали со нив се вршеле уцени врз бизнисмени. „Во која европска држава се следи лидер на најсилна партија и новинари и медиуми? Дали со добиените информации се тргувало со влијание и се уценувале бизнисмени? Времето ќе покаже, и ќе ги даде одговорите. Одговорност мора да има,“ нагласува Томовски.

Македонија | пред 6 месеци

Ексдиректорот на АНБ денес ќе слави, а утре ќе одговори за наводите дека незаконски се следени и прислушувани политичар, јавен обвинител и новинари

Поранешниот директор на Агенцијата за национална безбедност (АНБ), Виктор Димовски, се огласи по повод наводите дека додека раководел со институцијата, се вршело незаконско следење и прислушување. Во кратка објава на социјалните мрежи, тој порача:„Денес е ден за славење, а од утре аргументиран одговор на наводите од брифинг во АНБ одржан деновиве...“.Оваа негова изјава доаѓа во контекст на најновите информации од АНБ, според кои до Јавното обвинителство биле доставени три известувања за поранешен директор и група вработени поради индиции за незаконско и непрофесионално постапување во периодот 2019–2024 година. Порталот „Плусинфо“ веќе објави дека таргети биле премиерот Христијан Мицкоски, обвинителката Вилма Русковска, новинарите Кристијан Ландов и Љупчо Златев.Димовски најави дека веќе од утре ќе излезе со став и аргументиран одговор на изнесените тврдења. 

Коментари | пред 6 месеци

Александар Николоски за нелегалното прислушување: „Повикувам Обвинителството ова да го истражи и одговорните да бидат процесуирани“

Потпретседателот на Владата и министер за транспорт и врски, Александар Николоски, повика Обвинителството да отвори истрага и да ги процесуира одговорните за наводната злоупотреба на тајните служби, оценувајќи дека расчистувањето е клучно за демократијата.-ОДГОВОРНОСТ И ПРОЦЕСУИРАЊЕ НА ОДГОВОРНИТЕ ЗА ЗЛОУПОТРЕБА НА ТАЈНИТЕ СЛУЖБИ КАКО ПРЕДУСЛОВ ЗА ДЕМОКРАТИЈА ВО МАКЕДОНИЈА!Во опозиционите денови искажувавме сомнежи дека сме следени од тајните служби кои беа злоупотребувани од власта на СДСМ и ДУИ, а со нив и Стево Пендаровски.Имавме сомнеж дека Агенцијата за разузнавање пишува клеветнички лажни извештаи до западните партнери и сојузници, а АНБ следела и прислушувала.Тоа беше начин за политичка дискредитација кој не им успеа! Промените се случија на минатогодишните избори, а со тоа и патот кон расчистување во тајните служби и одговорност за оние кои ги злоупотребуваа!Повикувам Обвинителството ова да го истражи и одговорните да бидат процесуирани. Доста е од злоупотреби на тајните служби!!!

Македонија | пред 6 месеци

Плусинфо: Мицкоски, Русковска, новинарите Ландов и Златев биле таргети - списокот на незаконски следени и прислушувани јавни личности е многу поголем

По известувањето на АНБ дека до Обвинителството пријавиле незаконско и непрофесионално постапување и следење на лидер на опозициска партија, како и група новинари, „Плусинфо“ објави дека на списокот за незаконско следење бил и јавен обвинител. Порталот, повикувајќи се на свои извори, пишува дека во периодот од 2019 до 2024 година, мета биле лидерот на ВМРО-ДПМНЕ, Христијан Мицкоски, поранешната обвинителка Вилма Русковска и новинарите Кристијан Ландов и Љупчо Златев.„Плусинфо“ пишува дека Вилма Русковска во изјава им потврдила дека била незаконски следена.„Немам информации дали сум била прислушувана, но извор во кој имам доверба ми кажа дека сум била незаконски следена од страна на Јовче Ременски, сопругот на поранешната пратеничка Фросина Ременски, против која во тоа време поведов обвинение,“ изјави Русковска.Плусинфо со Русковска ja споделиле и информацијата дека била незаконски прислушувана, во еден или повеќе разговори со новинарот Кристијан Ландов, на што искоментирала: „Јас за тоа немам информации, но не би ме изненадило да било така. Можно е јас да сум била таргет, а можно е и новинарот да бил таргет. Се надевам дека и тоа прашање ќе се расветли“.Ландов: „Не сум имал причина да се сомневам“Порталот побарал коментар и од новинарот Ландов, кој рекол: „Не сум имал причина да се сомневам. Дали било можно или не, тоа треба да го кажат службите. Со Русковска сум имал комуникација, како и со други обвинители што работеа на предмети од јавен интерес. Таа комуникација датира од 2020 година наваму, кога Русковска беше шеф на ОЈО-ГОКК“.Златев: „Се отвораа апсурдни предмети, целта беше да бидам следен“Новинарот Љупчо Златев, пак, тврди дека уште во 2019 година добил информации од свиркачи во АНБ дека бил ставен под посебни истражни мерки.„Во периодот 2019–2024 година за мене се отвораа апсурдни предмети, со единствена цел да бидам следен и прислушуван. Се користеа белешки со измислени содржини, од луѓе кои случајно ги познавав и кои постојано се обидуваа да стапат во контакт со мене. Еден од нив е осуден за убиство, друг е подкастер и уредник, трет е измамник кој пропадна една од најголемите градежни компании,“ изјави Златев.За контрола на посебните истражни мерки, според „Плусинфо“, за целиот период бил задолжен сегашниот републички обвинител, Љупчо Коцевски.Целиот текст на Плусинфо

Македонија | пред 6 месеци