ТЕАТАР

Mozzart продолжува со Театар на хуманост: Донација за „Банка за Храна“ носи билет за „Ивона, принцезата на Бургунд“

Mozzart ја спојува уметноста и хуманоста: со донација од 100 денари за Банка за храна, добивате бесплатен билет за претставата „Ивона, принцезата на Бургунд“.На 17 април, Театар Комедија ќе биде дом на една вечер полна со емоции и магија. Елена Кузманов, Сергеј Димоски, Кристина Христова Николова, Мирјана Поповска Ристов, Кристина Ласовска, Ева Скeндеровска, Виктор Арсов, Роберт Ристов, Илија Илиоски и Александар Велјановски ќе ве поведат низ свет каде секој збор и секој поглед на сцената носи човечност.Секоја донација од 100 денари значи еден оброк за оние на кои им е најпотребно. Еден билет – една добрина. Една вечер – една надеж.Од четврток, 09.04.2026, во Бистро Комедија, секој работен ден од 10.00 до 13.00 часот, можете да донирате и да го земете вашиот билет.Бидете дел од оваа вечер каде сцената и добрината се претвораат во светлина што останува во срцата – затоа што вистинската уметност е онаа што дарува надеж. ПР

Магазин | пред 1 седмица

(Видео) Театарот остана без својата Офелија: Почина Ленче Делова

Почина Ленче Делова, истакната македонска театарска, филмска и телевизиска глумица, чие име повеќе од половина век беше нераскинливо поврзано со сцената на Драмски театар – Скопје.Родена на 15 јуни 1948 година во Скопје, Делова својот актерски пат го започнала уште во 1964 година како аматер на сцената на тогашниот Драмски младинско-детски театар. Имала само 16 години кога за првпат стапнала на сцената, која подоцна ќе стане нејзин втор дом. Во 1970 година се вработила во Драмски театар – Скопје, каде што остана сè до пензионирањето во 2013 година, оставајќи зад себе богата и значајна актерска трага.Со специфичен и автентичен сценски сензибилитет, Делова беше препознатлива по длабочината и суптилноста на својата игра. Нејзината Офелија во „Хамлет“ ѝ ја донесе Наградата „13 Октомври“ во 1978 година, а за улогата на Трајанка во „Ни ќар – ни зијан“ ја доби наградата за најдобро глумечко остварување на МТФ „Војдан Чернодрински“ во Прилеп во 1996 година. Во 2006 година ѝ беше доделена и наградата за животно дело „Војдан Чернодрински“, како признание за нејзиниот исклучителен придонес во македонскиот театар.Покрај театарот, Делова остави белег и на филмското и телевизиското платно. Ги оствари улогите во бројни телевизиски филмови и серии, меѓу кои „Итар Пејо“, „Илинден“, „Чук Чук Стојанче“, „Македонски народни приказни“, „Светот има осум страни“, како и во филмовите „Диво месо“, „Тетовирање“, „Пред дождот“, „До балчак“ и многу други. Нејзиното присуство беше препознатливо и во продукциите што ги одбележаа различните етапи од развојот на македонската телевизиска и филмска сцена.Ленче Делова буквално го живееше својот живот низ театарот. Нејзината животна приказна се испреплетуваше со приказните што ги создаваше сцената – од младешкиот ентузијазам до зрелата актерска мудрост. Со нејзиното заминување, македонската културна сцена губи тивка, но моќна уметничка присутност, која со години ги обликуваше чувствителноста и естетиката на публиката.

Македонија | пред 2 месеци

Народниот театар Битола со претставата „Црно семе“ ќе гостува на сцената на Македонскиот народен театар

Народниот театар Битола со претставата „Црно семе“ ќе гостува на сцената на Македонскиот народен театар, на 20 февруари, во 20 часот. Станува збор за сценска адаптација на истоимениот антологиски роман на Ташко Георгиевски, во режија на Андреј Цветановски.„Црно семе“ е моќна и емотивна сценска приказна, која отвора едно од најболните поглавја од македонската колективна меморија — судбината и голготата на Македонците од Егејска Македонија по Втората светска војна.Преку личните судбини на ликовите, се отвораат теми за страдањето, истрајноста, идентитетот и достоинството, како и потребата приказните за минатото да останат живи и пренесени на новите генерации.Драматизацијата е на Јелена Цветановска, сценографијата на Сергеј Светозарев, костимографијата на Благој Мицевски, сценските движења ги потпишува Дамјан Цветановски, а музиката е на Димитар Андоновски.Во претставата настапуваат: Мартин Мирчевски, Огнен Дранговски, Васко Мавровски, Никола Стефанов, Петар Спировски, Никола Пројчевски, Хари Михајловски, Александар Стефановски, Петар Горко, Борче Ѓаковски, Живко Борисовски, Марија Цветановска, Александар Димитровски, Александар Копања, Давид Балтовски, Филип Стефановски, Виктор Крстевски и Александар Ѓоргиовски.„Ако ние не ги раскажуваме нашите приказни, никој друг нема. Затоа мора да се сеќаваме на имињата и судбините на нашите луѓе“, истакнува режисерот Андреј Цветановски, нагласувајќи ја улогата на театарот како чувар на историската и човековата вистина.Билетите за изведбата се веќе пуштени во продажба и се достапни онлајн, како и на билетарницата во Македонскиот народен театар.

Магазин | пред 2 месеци

Политичарите поважни од уметноста: Одложена претстава во битолскиот театар поради прослава на Денот на албанската азбука

Претставата „Жиголо“ на НУ Народен театар Битола синоќа не се одржа, откако влезот кон Новата сцена беше затворен од страна на Министерството за внатрешни работи поради засилени безбедносни мерки. Иако актерската екипа била подготвена, а пред службениот влез имало голем број посетители, претставата морала да биде одложена непосредно пред почетокот.Од театарот велат „системот го „киднапираше” театарот.Од театрот информираат дека МВР околу два часа пред претставата ги известило дека паралелниот настан во НУ Центар за култура Битола бил проценет како настан со висок безбедносен ризик, поради присуство на високи гости, меѓу кои и албанскиот политичар Албин Курти и Изет Меџити, кои присуствувале на прославата на Денот на албанската азбука. Поради тоа, полициски службеници го пломбирале влезот на Новата сцена, со што било спречено одржувањето на театарската претстава.Од театарот јавно реагираат дека ваквиот потег е некоректен – не само кон институцијата и ансамблот, туку пред сè кон публиката. Луѓе.Посетителите кои купиле билети ќе можат од понеделник да ги рефундираат средствата или да извршат замена за друга претстава во просториите на театарот.

Македонија | пред 4 месеци

Почина актерот Самоил Стојановски

На 54-годишна возраст почина театарскиот, филмски и телевизиски актер Самоил Стојановски, извести велешкиот театар „Јордан Хаци Константинов Џинот“, каде што тој беше вработен.Неговата посветеност и топлина што ги споделуваше со сите што го познаваа ќе останат засекогаш во сеќавањата. Нека спомените за него бидат утеха, а неговото дело сведоштво за неговиот живот и љубовта кон театарот, велат од велешкиот театар.Роден на 3 ноември 1970 година во Скопје, тој беше дел од македонската актерска сцена повеќе децении. Од 2003, па до неговиот последен аплауз во декември годинава, беше вработен во Народниот театар „Јордан Хаџи Константинов – Џинот“ во Велес.На сцената на Велешкиот театар создаде ролји во бројни претстави, меѓу кои: „Будење“, „Ѕвонарот на Богородичната црква во Париз“, „Четвртата сестра“, „Орест“, „Жени во народното собрание“, „Сомнително лице“, „Враќање“, „Железно пиле“, „Дом за птици“, „Да се заборави Херострат“, „Х-Хамлет“, „Птици“, „Џинот, учителот“, „Веселите жени од Виндзор“, „Тероризам“, „Баханалии“, „Злосторство на островот на козите“, „ММЕ кој прв почна“, „Онегин“, „Шашардисани времиња“, „Принцезата и Гускарот“, „Последниот Балкански вампир“, „Крал Лир“, „Тартиф“, „Најважната работа на светот“, „Приказни од шестиот кат“, „Класен непријател“, „Добрата надеж“, „Мачорот во чизми“, „Ана Комнена“, „Синиот портокал“, „Лисистрата“, „Елешник“, „Креонт и Антигона“ и други.Стојановски оствари улоги и во филмската и телевизиската продукција, учествувајќи во проекти како што се „Трст виа Скопје“ (1987–1990), „Погрешно време“ (2000), „Вампирџија“ (2002), „Крајот на играта“ (2002), „Крчма на патот кон Европа“ (2005), „Ова не е американски филм“ (2011), „Старо купуем“ (2013), „Приказни од животот“ (2014), „Ослободување на Скопје“ (2016), „Преспав“ (2016), „Македонски народни приказни“ (2017) и „Црвениот поет“ (2024) и други.

Македонија | пред 1 година

Вечерва во Прилеп почнува театарскиот фестивал „Војдан Чернодрински“

Со свеченост на платото пред Домот на културата „Марко Цепенков“, со врачување на наградите за животно дело и со првата претстава во официјалната конкуренција, вечер во Прилеп ќе биде отворен 57. Македонски театарски фестивал „Војдан Чернодрински“. Под мотото „Враќање дома“ најреномираниот и најстар национален фестивал на театарската уметност до 16 јуни ќе понуди богата програма.На отворањето, од 20.30 часот е најавено да се обратат министерката за култура Бисера Костадиновска-Стојчевска, градоначалникот на Прилеп, Борче Јовчески, и уметничкиот директор на фестивалот, Ана Стојаноска.На актерите Петар Мирчевски и Петар Темелковски ќе им бидат врачени наградите за животно дело, а од 21.30 часот во големата сала од Домот на културата „Марко Цепенков“ ќе биде прикажана првата од 10-те претстави во официјалната конкуренција - „Нема струја за електричниот стол“ во режија на Дејан Пројковски, во продукција на театарот „Јордан Хаџи Константинов – Џинот“ од Велес.Во рамките на Фестивалот, од 19 часот, во градската библиотека „Борка Талески“ ќе биде отворена ретка и роднокрајна збирка во чест на авторот во фокусот, Коле Чашуле.Во официјалната програма се 10 претстави на македонските професионални театри, пет се во независната продукција.Програмата на Фестивалот ќе почнува секој ден во 10 часот со „Чернодрински за деца“. Напладне ќе се организираат разговори на тркалезна маса, на кои ќе се дискутира за претставите што ќе бидат на програмата од претходниот ден. Ќе има промоции на книги, меѓународна конференција, а ќе биде отворена и изложбата на костими и фотографии од претстави на кои работел костимографот Благој Мицевски во изминатите речиси 20 години.Годинава, првпат фестивалското жири го сочинуваат членови од странство - Мики Радојниќ, театролог, актуелен директор на „Стеријино позорје“, Милош Латиновиќ, директор на театарот и фестивалот „Битеф“, и Јанко Љумовиќ, театарски продуцент, професор, некогашен министер за култура на Црна Гора.Фестивалот ќе биде затворен на 16 јуни со свечено доделување на наградите. Во нивна чест ќе гостува Српско народно позориште од Нови Сад со „Последниот балкански вампир“ по текст на Дејан Дуковски и во режија на Александар Поповски.

Магазин | пред 2 години

„Ожени ме“ – театарска претстава на Театар „Провокација“ во КИЦ

Во Културно-информативниот центар – Скопје вечер ќе биде изведена театарската претстава „Ожени ме“ во режија на Роберт Ристов. Драматизацијата е работена според мотиви од урбаните сценарија: „Ожени ме“, „Заедништво“, „Храна и љубов“ и „Брачна приказна“.– „Ожени ме“ е насловот на една од двете претстави („Ожени ме“ и „Разведи ме“) кои, всушност, се две поглавја од „Флип-изданието“ на претставите со заеднички наслов „Две нијанси црвена“. Ова е еден уникатен начин да се опфатат две теми/претстави кои претставуваат лице и опачина, едната на другата – информира организаторот.Во претставата, улогите ги толкуваат актерите Изабела Јакимова и Бранко Атанасов.

Магазин | пред 3 години

Tеатарска претстава во чест на Горан Стефановски

Преку театарска претстава, посветена на Горан Стефановски, Актерска школа на Весна Петрушевска, КМК Продукција и Македонскиот народен театар ќе оддадат почит на еден од најзначајните и најизведувани македонски драмски автори воопшто.Горан Стефановски е македонски драмски автор, универзитетски професор и академик. Претставник е на модерната македонска драматургија и автор е на сценарија за ТВ серии, ТВ филмови и драми. Драмските дијалози во неговите дела и по 30 години ја отсликуваат актуелната стварност во Северна Македонија.Горан е често име на нашите простори изведено од именката гора, но исто така со значение голем и силен. Таква е нашата љубов кон Горан, силна, огромна, истрајна и посветена. Можете лесно да паднете во неговата стапица на зборови. Децата од актерската школа лесно го разбираат и нивниот поттекст е прецизно точен. Јас сакам секое дете да знае барем по еден монолог на Горан. Така живее само онолку колку го зборуваме. Ние немаме друг Горан. Имаме само еден! Храбар, бескрајно талентиран, точен, шармантен и полн со љубов.– истакна Весна Петрушевска.Горан Стефановски е изведуван на сите македонски сцени (Скопје, Битола, Штип, Струмица, Прилеп, Велес, Охрид, и др.), потоа во сите некогашни југословенски културни центри (Белград, Загреб, Љубљана, Сараево, Нови Сад, Ниш, Титоград (Подгорица), итн.), како и во големите театарски центри во светот: Париз, Будимпешта, Лондон, Софија, Москва, во повеќе градови во САД, во Брезно во Словачка, во Лоѓ во Полска, Антверпен во Белгија, Стокхолм итн.Премиерата на театарската претстава ќе се одржи на 26ти март, со почеток во 12 часот, во Македонскиот народен театар, на чија сцена ќе излезат учениците од актерската школа на Весна Петрушевска.За првпат ќе се слушнат на сцена неговите генијални текстови од книгата „Стапица“. Таа книга ги содржи сите тајни на драмскиот занает и на приодот кон создавање и градење лик. Во вистинска смисла на зборот за еден актер предизвик, за малите актери мисловен и актерски предизвик и задача. Горан е нашиот идентитет, нашиот најдобар драмски писател. Театарот немаше да биде ист ако не постоеше Горан. Горан е љубов.- додаде Петрушевска.Поради големиот интерес, двете изведби на 26ти март се распродадени, додека, следната изведба е на 9ти април, од 12.00 часот во Македонскиот народен театар.Напомена: Картите се во ограничен број.

Магазин | пред 4 години