ТРАМП

Трамп: Решив шест војни за шест месеци, знам што правам, а медиумите немаат поим

Американскиот претседател Доналд Трамп се пофали со своите, како што ги нарече, „мировни достигнувања“ во пресрет на денешните преговори за Украина.„Точно знам што правам“, порача Трамп во нова објава на социјалните мрежи.Во текот на својот втор мандат, Трамп повеќепати се претставуваше како „главен мировник“, нагласувајќи ја својата улога во решавањето на глобалните конфликти. Во најновата објава тој наведе дека за шест месеци решил шест војни, „од кои една можела да заврши со нуклеарна катастрофа“.„Сепак, морам да читам и слушам како Wall Street Journal и многу други, кои навистина немаат поим, ми велат дека сè правам погрешно во врска со руско-украинскиот хаос“, напиша Трамп.Тој повторно го обвини својот претходник Џо Бајден за избивањето на војната во Украина, иако руската инвазија ја започна Владимир Путин.„Нарекувајте ме како сакате – главен мировник, реалист, човек кој мисли со своја глава – но точно знам што правам. Решив шест војни за шест месеци. Една од нив можеше да заврши со нуклеарна катастрофа. А пак морам да слушам исти луѓе кои тврдеа дека Бајден знае што прави. Погледнете каде нè доведе тоа! Да не беше Бајден, војна немаше да има“, напиша Трамп.

Свет | пред 7 месеци

Можно е трилатерална средба меѓу Трамп, Зеленски и Путин до крајот на неделава

Според информации на „Скај њуз“, европските дипломати добиле насоки од своите американски колеги да бидат подготвени за можноста од трилатерална средба меѓу Доналд Трамп, Володимир Зеленски и Владимир Путин. Состанокот би можел да се одржи подоцна оваа недела, зависно од резултатот на денешните разговори.Според договорот меѓу Соединетите Држави и европските партнери, средбата треба да се случи на европско тло, освен ако не се појават непредвидени промени во последен момент.За време на видео-конференцијата на т.н. „коалиција на добронамерните“ што се одржа минатиот викенд, италијанската премиерка Џорџија Мелони го предложи Рим како место на одржување, додека францускиот претседател Емануел Макрон ја истакна Женева како опција.Неофицијално се наведува дека украинскиот претседател Зеленски и американскиот лидер Трамп имаат наклонетост кон Рим, додека рускиот претседател Путин повеќе би ја прифатил Женева.Министерствата за надворешни работи на Италија и на Швајцарија веќе изразија подготвеност да го организираат овој можен состанок.

Свет | пред 7 месеци

Вашингтон ја крои иднината на војната: Трамп, Зеленски и европските лидери на заедничка маса

Украинскиот претседател Володимир Зеленски денеска ќе се сретне со Доналд Трамп во Вашингтон, заедно со повеќемина европски лидери, во обид да се постигне мировен договор. Причина за вниманието е стравувањето дека американскиот претседател би можел да изврши притисок врз Киев да прифати решение што би било во корист на Москва, јавува „Ројтерс“.На средбата ќе присуствуваат лидерите на Велика Британија, Германија, Франција, Италија, Финска, како и претставници на Европската Унија и НАТО. Тие очекуваат да му дадат поддршка на Зеленски во значаен дипломатски момент за војната и да спречат повторување на непријатната ситуација од февруари, кога украинскиот претседател имаше незгодна средба со Трамп во Овалната соба.Прво е предвидена тет-а-тет средба на Трамп и Зеленски во Овалната соба, по што ќе следи заедничка дискусија со европските лидери во Источната соба на Белата куќа.Откако во петокот организираше церемонијален прием за рускиот претседател Владимир Путин во Алјаска, Трамп изјави дека мора да се постигне договор за ставање крај на 42-месечниот конфликт во кој загинаа десетици илјади луѓе, а милиони беа раселени.„Претседателот на Украина, Зеленски, може веднаш да ја прекине војната со Русија, ако сака, или да продолжи да се бори“, напиша Трамп на својата платформа Truth Social, користејќи различна транслитерација на неговото име.Сепак, Зеленски речиси целосно ги отфрли понудите што Путин ги изнесе на таа средба – меѓу кои и барањето Украина да се откаже од преостанатиот дел од источниот регион Доњецк, од кој моментално контролира една четвртина.„Ни се потребни вистински преговори, што подразбира да почнеме од актуелната линија на фронтот“, порача Зеленски во Брисел во неделата, додавајќи дека уставот на неговата земја не дозволува откажување од територија.Загрижувачки за Киев е тоа што Трамп, кој претходно го поддржуваше предлогот на Украина за брзо примирје како основа за подлабоки мировни разговори, по самитот ја смени позицијата и се приближи кон руското гледиште – преговори за сеопфатен договор додека борбите продолжуваат.„Му сум благодарен на американскиот претседател за поканата. Сите сакаме оваа војна да заврши што е можно побрзо и со траен мир“, објави Зеленски на Телеграм по пристигнувањето во Вашингтон во неделата навечер. „Русија мора да ја заврши војната што самата ја започна. Се надевам дека заедно со САД и европските партнери ќе ја принудиме на вистински мир.“Предлозите на Путин, кои претходно ги објави „Ројтерс“, изгледаат неприфатливи за Украина. Украинските сили се добро утврдени во Донецк, каде што градовите и возвишенијата се клучни за одбраната од руските напади.Киев инсистира дека секој можен мировен договор мора да вклучува силни безбедносни гаранции за да се спречи нова агресија од Русија – земја која го анектираше Крим во 2014 година и ја започна целосната инвазија во 2022 година.Европските лидери, загрижени дека би можеле да бидат тргнати на страна од договорот, во неделата разговараа со Зеленски за усогласување на заеднички став пред денешната средба со Трамп.Присуството на најважните европски сојузници во Вашингтон, кои отворено го поддржуваат Киев, треба да му помогне на Зеленски да ги избегне горчливите искуства од неговата претходна посета на Овалната соба.

Свет | пред 7 месеци

Европските лидери за NY Times потврдија: Трамп ја поддржал идејата на Путин за крај на војната

Американскиот претседател Доналд Трамп ја поддржува иницијативата на Владимир Путин за постигнување мировен договор со Украина, кој предвидува предавање на делови од Донбас под руска контрола, објави New York Times, повикувајќи се на двајца високи европски функционери.Трамп им рекол на европските лидери дека верува оти мировен договор е можен ако украинскиот претседател Володимир Зеленски се согласи да се повлече од регионот Донбас, кој Русија не успеа целосно да го заземе и покрај повеќе од три години жестоки борби.Според изворите, на самитот на Алјаска Путин директно побарал Украина да се повлече од Донецк и Луганск како услов за запирање на војната. За возврат, Москва би се согласила да ја „замрзне“ бојната линија во јужните региони Херсон и Запорожје.Иако Луганск е речиси целосно под руска контрола, Украина сè уште ги држи главните делови од Донецк – вклучително и градовите Краматорск и Славјанск, како и силно утврдените позиции кои ја чинеле земјата десетици илјади жртви во одбрана.Поддршката на Трамп за предавање на Донбас – регион богат со јаглен и железна руда – доаѓа во момент кога тој јавно бара директно склучување мировен договор, а не само прекин на огнот, кој, според него, „често не трае долго“.

Свет | пред 7 месеци

Ова е писмото што Меланија му го испрати на Путин – Трамп лично му го предаде

FOX News објави дека првата дама на САД, Меланија Трамп, испратила писмо до рускиот претседател Владимир Путин, кое американскиот претседател Доналд Трамп лично му го предал за време на самитот на Алјаска.Што пишува во писмото?Во писмото, кое е објавено во целост, Меланија се обраќа на емотивен начин:„Секое дете во своето срце носи исти тивки соништа, било да е родено во скромна рурална средина или во величествен град. Тие сонуваат за љубов, можности и заштита од опасности... Господине Путин, вие можете да им го вратите нивниот насмеан глас.Штитејќи ја невиноста на тие деца, ќе служите не само на Русија, туку и на целото човештво. Вие сте човек способен да ја оствари таа визија со еден потег на перото – веќе денес. Време е.“Reuters потврди дека Трамп на состанокот лично го предал писмото од својата сопруга. Меланија, родена во Словенија, не отпатувала со него на Алјаска.Проблемот со одземање на украински деца е една од најтешките точки во војната:Украина обвинува дека десетици илјади деца биле одведени во Русија или на окупираните територии без согласност на семејствата, што го квалификува како геноцид според Конвенцијата на ОН.Москва, пак, тврди дека само „штити ранливи деца од војната“, што Киев и Западот го нарекуваат пропаганда.

Свет | пред 7 месеци

„Ужасно, нож во грб“ – Украина во шок по сигналите дека Трамп ги прифаќа условите на Путин

Американскиот претседател Доналд Трамп, кој пред само неколку дена му најави на Володимир Зеленски дека ќе изврши притисок врз Владимир Путин заради војната, по самитот на Алјаска со рускиот лидер изненадувачки ја смени реториката и се доближи до позициите на Кремљ.Трамп: Сакам директен мировен договорНа својата мрежа Truth Social, Трамп порача дека сака „директно да се оди кон мировен договор, а не само кон примирје кое често се покажува како неодржливо“. Тој најави и дека нема намера да воведува нови санкции кон Русија – остар пресврт во однос на досегашната американска политика.Путинови услови: повлекување од Донецк и ЛуганскСпоред извори на Financial Times, Путин од Трамп побарал Украина целосно да се повлече од Донецк и Луганск, како предуслов за крај на војната. Во замена, Москва наводно би ја замрзнала линијата на фронтот на останатите делови од боиштата.Украински функционери реагираа жестоко.„Ова е нож во грб“, изјавил висок државен претставник за FT.Претседателот на собранискиот комитет за надворешна политика, Олександр Мережко, изјавил: „Ужасно.“„Трамп практично се усогласи со Путин, а сега двајцата можат да почнат да ја принудуваат Украина на мировен договор кој во суштина значи капитулација,“ предупреди тој.Украина: нема предавање на источните територииОфицијален Киев соопшти дека Зеленски нема да прифати откажување од Донецк и Луганск, иако е подготвен за преговори за територијалните прашања во Вашингтон и на евентуален трилатерален состанок со Трамп и Путин.Пратеничката и поранешна вицепремиерка Ивана Климпуш-Цинцадзе праша:„Како ќе го спречи тоа Путин да се прегрупира и повторно да нападне?“Граѓанската активистка Олга Ајвазовска предупреди дека предавањето на територии кои Русија никогаш реално не ги зазела би предизвикало огромна напнатост: „Тогаш ќе се отвори прашањето – зошто воопшто се браневме сите овие години?“„Голема победа за Путин“Според аналитичарот Александар Хара од Центарот за одбранбени стратегии во Киев, самитот бил „голема грешка и голема победа за Путин“. Тој предупредува дека ако преговорите пропаднат, Трамп би можел да ја префрли вината врз Зеленски.„Русија уште од 2014 смета дека секоја украинска влада е нелегитимна и верува дека целите може да ги постигне со воена сила,“ додаде тој.На боиштето: крвава реалностИ додека дипломатијата бара решение, на теренот продолжува жестоката војна. Русија изминатиот викенд се пробила 10 километри кај рударскиот град Добропиље, но украинската армија ги запрела со елитни единици – како Азов и 79. воздушно-десантна бригада.Зеленски изјави дека има „успеси на некои од најтешките делови од Донецкиот регион“, но предупреди дека Москва ќе продолжи со офанзиви за да обезбеди подобри позиции пред преговорите.Во близина на Покровск, украински командант на единица за дронови напиша на Телеграм:„Преговорите се преговори, но борбите продолжуваат. Ако не победиме на бојното поле – никаков договор нема да не спаси.“Во Киев, подготовките за самитот се одвиваа во необична тишина: неколку дена немаше напади со дронови-камикази врз главниот град, но денес повторно се огласија сирените за воздушна опасност.

Свет | пред 7 месеци

Кабинетот на Зеленски: Долг разговор со Трамп, се вклучија и европски лидери

Кабинетот на украинскиот претседател потврди дека Володимир Зеленски утрово остварил долг телефонски разговор со американскиот претседател Доналд Трамп.„Разговорот беше долг – најпрво меѓу претседателите Зеленски и Трамп, а потоа во него се вклучија и европски лидери“, соопштија од кабинетот на Зеленски.Потсетуваме, украинскиот претседател не учествуваше на разговорите меѓу Трамп и Владимир Путин на Алјаска, но американскиот лидер претходно најави можност за нова средба, овојпат и со Зеленски, доколку првиот состанок помине успешно.Од кабинетот на британскиот премиер, пак, потврдија дека Киер Стармер по самитот на Алјаска разговарал и со Трамп и со Зеленски. Утрово, тој се приклучил на заедничкиот повик со лидерите на други европски членки на НАТО.Во соопштението се додава дека Стармер наскоро повторно ќе разговара со европските лидери.

Свет | пред 7 месеци

Трамп му предаде писмо од Меланија на Путин – темата, украдените деца од Украина

Американскиот претседател Доналд Трамп, за време на самитот на Алјаска, лично му предал писмо од сопругата Меланија Трамп на рускиот претседател Владимир Путин, соопштија за агенцијата Ројтерс високи функционери од Белата куќа.Првата дама, која е родена во Словенија, не патуваше со Трамп во Алјаска, но во писмото, според изворите, таа го отвора прашањето за судбината на децата погодени од војната – особено за оние кои биле киднапирани и однесени во Русија или на територии под руска окупација.Според податоците на Киев, од почетокот на целосната руска инвазија во февруари 2022 година, најмалку 19.500 украински деца се депортирани или насилно оддалечени од своите домови. Украинските власти инсистираат дека никаков мировен договор не смее да се потпише без гаранции за нивно враќање.Прашањето е крајно чувствително и на меѓународна сцена: во 2023 година Меѓународниот кривичен суд издаде налог за апсење за Путин и неговата комесарка за права на деца, Марија Лвова-Белова, токму поради незаконската депортација на украински деца – дело што Киев го смета за воен злостор и чин на геноцид.

Свет | пред 7 месеци

Трамп од „Ер форс уан“: Долг повик со Зеленски, па разговори со НАТО лидерите

Претседателскиот авион „Ер форс уан“ на Доналд Трамп се врати од Анкоридж и слета во Вашингтон околу 02:00 часот по локално време (07:00 BST), јавуваат новинарите кои патуваа со американскиот претседател.Според портпаролката на Белата куќа, Каролин Левит, за време на летот Трамп остварил долг телефонски разговор со украинскиот претседател Володимир Зеленски.По слетувањето, Трамп веднаш стапил во контакт и со лидерите на НАТО, информираат од Белата куќа.

Свет | пред 7 месеци

Путин предложи нова средба – „следниот пат во Москва“

По завршувањето на самитот во Алјаска, нема реакција од украинскиот претседател Володимир Зеленски, кој не беше поканет да учествува во разговорите меѓу Доналд Трамп и Владимир Путин.Американскиот претседател претходно најави дека неговиот прв телефонски повик по средбата ќе биде упатен токму до Зеленски. Британскиот премиер Киер Стармер, инаку еден од најгласните европски поддржувачи на Украина, исто така засега не ја коментира средбата. Зеленски само пред неколку дена беше во Лондон, каде заедно со Стармер нагласија „силно чувство на заедништво“.Од друга страна, Путин изјави дека е подготвен за нова средба со Трамп – „следниот пат во Москва“. Засега нема дополнителни детали за можно продолжување на преговорите или за тоа дали на нив ќе учествува и Киев.

Свет | пред 7 месеци

Самитот во Алјаска заврши без договор – Трамп и Путин разговараа три часа

Пет часа по завршувањето на самитот во Алјаска, американскиот претседател Доналд Трамп и рускиот претседател Владимир Путин ја напуштија средбата без да постигнат договор за прекин на војната во Украина.Двајцата лидери слетаа во Анкоридж нешто по 11:00 часот по локално време, каде што беа пречекани со црвен килим и долго ракување. Путин, видливо расположен, заедно со Трамп беше возен во американското претседателско возило „The Beast“ – потег што руските државни медиуми го претставија како симбол на блискост.Средбата траела околу три часа, а на масата со лидерите присуствувале и двајца блиски советници од двете страни. Слоганот на самитот беше „Pursuing Peace“ („Во потрага по мир“), но претседателот на Украина, Володимир Зеленски, кој веќе предупреди дека иднината на земјата не може да се одлучува без Киев, повторно не беше вклучен во разговорите.По средбата, новинарите беа собрани на она што беше најавено како заедничка прес-конференција, но и Трамп и Путин дадоа само кратки изјави без да одговараат на прашања. Путин одржа подолго обраќање, но минимално ја спомна Украина, нагласувајќи дека е „искрено заинтересиран“ да се стави крај на конфликтот.„Сè уште има точки на несогласување. Нема договор додека не се постигне вистински договор“, изјави Трамп, додавајќи дека „не стигнавме таму иако имаше напредок“.Еден час по завршувањето на разговорите, двајцата претседатели повторно се качија во своите авиони и ја напуштија Алјаска. Во интервју за Fox News, Трамп го повика Зеленски да „направи договор“.Од Киев и европските сојузници сè уште се чека официјална реакција.

Свет | пред 7 месеци

Кој преговара за Украина без Украина: Трамп, Путин и „тројка на тројка“

Зад затворени врати во Алјаска, преговорите меѓу американската и руската делегација се одвиваат во формат „тројца на тројца“ – секој од претседателите има уште двајца клучни советници на масата.Од руската страна присутни се:Сергеј Лавров, министер за надворешни работи веќе повеќе од две децении, санкциониран заедно со Путин по почетокот на инвазијата врз Украина во 2022 година.Јури Ушаков, надворешнополитички советник на Путин повеќе од десет години и поранешен амбасадор во САД.Кремљ претходно најави дека во „проширениот формат“ ќе се приклучи и рускиот министер за одбрана, но не е познато кога.Од американската страна се:Марко Рубио, државен секретар и познат надворешнополитички „јастреб“ од кабинетот на Трамп.Стив Виткоф, специјален пратеник и личен пријател на Трамп, првично назначен за Блискиот Исток, но често вклучен во разговори за Украина.Истите четворица советници се сретнаа и во февруари во Саудиска Арабија на мировните преговори за Украина – тогаш без Трамп и Путин.И овојпат, на масата нема претставник од Украина, иако иднината на земјата е главна тема на преговорите. Забележителен е и отсуството на специјалниот пратеник на САД за Украина, Кит Келог.

Свет | пред 7 месеци

Од Кабул до Алјаска: Дежаву од мировната дипломатија на Трамп

На црвениот тепих во Алјаска, американскиот претседател Доналд Трамп му приреди топол пречек на Владимир Путин – гест што остро контрастира со односот на западните лидери кон рускиот претседател од почетокот на целосната инвазија врз Украина.Слоганот на самитот, „Pursuing Peace“ („Во потрага по мир“), на многумина им звучи познато. За време на првиот мандат на Трамп, во февруари 2020 година, неговата „високоризична“ дипломатија доведе до договор со Талибанците, познат како „Bringing Peace to Afghanistan“ – преговори во кои тогашната авганистанска влада беше целосно исклучена.Денес, повторно сведочиме на состанок на кој засегнатата страна – овојпат Украина – не е присутна на масата, иако се дискутира за нејзината иднина.Симболиката е дополнително нагласена од фактот што денот на средбата меѓу Трамп и Путин се поклопува со четвртата годишнина од враќањето на Талибанците на власт. За многумина, ова предизвикува непријатна паралела: тогаш, кога талибанското раководство постигна договор со САД, нивната победа беше само прашање на време. Некои аналитичари предупредуваат дека Владимир Путин денес може да размислува на ист начин.

Свет | пред 7 месеци

Руски медиуми воодушевени од гестот на Трамп, што го поканил Путин да се возат во неговиот автомобил

Руски државни медиуми со воодушевување известуваат за потегот на американскиот претседател Доналд Трамп на Алјаска, каде рускиот лидер Владимир Путин, наместо да се вози со својата претседателска лимузина „Aurus“, се приклучил во оклопното возило на Трамп.Според агенцијата РИА Новости, поканата дошла директно од Трамп, а Путин без двоумење прифатил. Државната телевизија Russia 24 го протолкува потегот како јасен знак на пријателство и како „ран почеток на разговорите“ пред официјалниот дел од самитот.„Американскиот претседател беше исклучително пријателски настроен кон Путин“, оцени водител на Russia 24, додавајќи дека „историското ракување“ на пистата било уште еден силен симбол на новата етапа во односите меѓу двете земји.CNN потсетува дека ова е прв пат двајцата лидери да се сретнат лице в лице откако Трамп ја започна својата втора претседателска функција.

Свет | пред 7 месеци

(Видео) Први фотографии од средбата Трамп–Путин: делегации, прашања и возвратен одговор од Путин

На самитот во Алјаска, каде што треба да се разговара за можен крај на војната во Украина, Доналд Трамп и Владимир Путин беа фотографирани како седат еден до друг, со јасно истакната порака „Pursuing Peace“ (Обид за мир) и „Alaska 2025“ во позадината.Двајцата лидери беа придружувани од своите најблиски соработници и членови на делегациите, додека новинарите упатуваа низа прашања кон нив. Во еден момент, рускиот претседател Путин изгледаше како да возвраќа со гласен одговор на дел од прашањата.Ова е прва официјална размена лице-в-лице меѓу двајцата лидери откако Трамп се врати во Белата куќа на втор мандат, а средбата е под будно око на светската јавност.

Свет | пред 7 месеци

ВО ЖИВО: Следете го самитот Путин-Трамп, двајцата слетаа во Алјаска

Американскиот претседател Доналд Трамп и рускиот претседател Владимир Путин ќе се сретнат вечерва во Алјаска.Трамп веќе слета во Алјаска, придружуван од своите најблиски соработници. Во меѓувреме, на пистата се спушти и руски владин авион.Состанокот, кој се смета за еден од најважните во обидите за завршување на војната во Украина, ќе може да се следи во живо.

Македонија | пред 7 месеци

Неочекуван пресврт: Трамп и Путин нема да разговараат насамо

Портпаролката на Белата куќа, Каролин Левит, денеска им изјави на новинарите дека претходно планираниот тет-а-тет состанок меѓу американскиот претседател Доналд Трамп и рускиот лидер Владимир Путин е променет.„Раните планови за средба помеѓу Доналд Трамп и Владимир Путин сега ќе вклучуваат и државниот секретар Марко Рубио, како и специјалниот пратеник Стив Виткоф“, изјави Левит.Оваа промена доаѓа неколку часа пред закажаната средба на двајцата лидери на воената база Елмендорф-Ричардсон во Анкорејџ, што ќе биде нивна прва лична средба откако Трамп се врати во Белата куќа за својот втор мандат.

Свет | пред 7 месеци

Air Force One слета во Анкорејџ – Трамп пристигна на историскиот самит со Путин

Американскиот претседател Доналд Трамп вечерва пристигна во Анкорејџ со Air Force One, заедно со државниот секретар Марко Рубио, специјалниот пратеник на Белата куќа Стив Виткоф и директорот на ЦИА Џон Ратклиф. Тимот ќе се обиде да посредува во постигнување на мир во војната меѓу Русија и Украина.Средбата со рускиот претседател Владимир Путин е закажана за 11:30 часот по локално време (19:30 GMT / 20:30 BST) на базата Елмендорф-Ричардсон. Ова ќе биде прва директна средба меѓу двајцата лидери откако Трамп ја презеде функцијата претседател на САД по втор пат.Разговорите се очекува да траат најмалку 6-7 саати.

Свет | пред 7 месеци

Самит во Анкореџ: Тимови за безбедност спречуваат закани и шпионажа

Кратко пред американскиот претседател Доналд Трамп и неговиот руски колега Владимир Путин да седнат на преговарачка маса, двајцата лидери се опкружени со строг безбедносен протокол кој има цел да ги заштити не само од физички закани, туку и од меѓусебна шпионажа, пренесува CNN.Поради итната организација на самитот, оваа недела во Анкореџ пристигнаа бројни федерални агенти и воен персонал задолжен за обезбедување на вакви настани со висок ризик. Главниот товар на осигурувањето го носи американската Тајна служба, но таа тесно соработува со безбедносниот тим на Владимир Путин.Дополнителното ниво на заштита го потврдуваат и податоците од интернет-услугите за следење летови, кои забележале дека утрово од локалниот аеродром полетал воен извидувачки авион Boeing E-3C, препознатлив по големата радарска купола, способен да открие воздушни закани, вклучително и авиони и проектили.Иако американските и руските тимови соработуваат во физичкото обезбедување на лидерите, зад кулисите се води „паралелна битка“ – заштита од техничко прислушување и компромитација.„Нема ни грам доверба меѓу разузнавачките служби“, изјавил висок безбедносен извор кој учествувал во обезбедување на слични состаноци. Според него, руската делегација веројатно користи „burner“ телефони и еднократни лаптопи за да избегне американско прислушување, а членовите добиваат детални инструкции за мерките на претпазливост.„Но, на Путин не му треба таква обука“, додал изворот, потсетувајќи дека рускиот претседател е поранешен офицер на КГБ.

Свет | пред 7 месеци

Трамп: Ако состанокот не оди во добра насока – си заминувам

Американскиот претседател Доналд Трамп изјави дека е подготвен да го напушти состанокот со рускиот лидер Владимир Путин доколку разговорите не се одвиваат во посакуваниот правец, пренесува CNN.Во краток исечок од интервју за Fox News, кое допрва ќе биде емитувано, Трамп рече: „Мислам дека ќе помине многу добро, а ако не – многу брзо ќе се вратам дома.“На директно прашање од водителот Брет Баер дали би си заминал ако состанокот тргне лошо, Трамп одговори без двоумење: „Би си заминал, да.“Овој став е во согласност со неговите коментари од претходниот ден за Fox Radio, кога истакна: „Ако состанокот е лош, нема да се јавувам на никого – си одам дома. Но ако е добар, ќе го повикам претседателот Зеленски и европските лидери“.

Свет | пред 7 месеци

(Видео) Трамп пред средбата со Путин: „Влогот е голем“

Американскиот претседател Доналд Трамп го опиша денешниот состанок со рускиот лидер Владимир Путин како средба со „високи влогови“, додека патуваше од Вашингтон кон Алјаска на седумчасовен лет.Трамп проценува дека шансите за неуспех се околу 25%, но не е јасно дали истата доза оптимизам ја дели и Путин, особено со оглед на тоа што нема многу индикации дека Москва е подготвена да се согласи на прекин на огнот, а уште помалку на поширок мировен договор.Кремљ соопшти дека очекува разговорите да траат шест до седум часа – нешто што не се совпаѓа со моменталниот распоред на Белата куќа.Трамп веќе гледа кон можен втор состанок, овојпат со вклучување на Украина и некои европски држави, но прво треба да се помине денешната голема пречка пред да се дојде до такво сценарио.

Свет | пред 7 месеци

(Видео) Од украински знамиња до молитви – Алјаска го пречекува самитот Трамп–Путин со поделени емоции

Додека американскиот претседател Доналд Трамп и рускиот лидер Владимир Путин се подготвуваат да слетаат во заедничката база Елмендорф–Ричардсон, 30 минути од Анкориџ, улиците во близина се исполнети со демонстранти и поддржувачи.„Путин треба да биде во затвор, а тој само така доаѓа на Алјаска,“ вели Хана Кореа, 40-годишна Украинка која се преселила во САД во 2019 година. Држејќи украинско знаме, таа признава дека се расплакала кога видела колку Американци даваат поддршка. „Тажно е што Зеленски не е поканет,“ додава таа.Во редовите на демонстрантите е и Кристофер Келихер, 53-годишен воен ветеран и жител на Алјаска: „Одвратно е… Путин не треба да е во нашата држава, а имаме идиот во Белата куќа кој ќе му се додворува.“Историјата на регионот со Москва додава тежина на средбата. Алјаска била купена од Русија во 1867 година за 7,2 милиони долари, а денес, руското културно наследство е видливо низ православните цркви. Во црквата „Свети Тихон“ во Анкориџ се одржуваат тридневни молитви, а свештеникот Николас Крегл вели: „Надеваме се оваа средба да донесе крај на конфликтот.“Меѓу поддржувачите е и рибарот Дон Кресли од градот Норт Пол: „Мислам дека е добра идеја. Би сакал да е и Зеленски тука… Трамп прави фантастична работа.“ Тој сака крај на војната „заради уништувањето на градовите и затоа што луѓето остануваат без домови, храна и средства за живот.“Сепак, напнатоста меѓу САД и Русија останува. Руски воени авиони често се пресретнувани во близина на алјасканскиот брег, а некои жители се чувствуваат изложени на ризик. „Живееме поблиску до Русија отколку до Вашингтон,“ вели Расел Вилсон од Анкориџ. „Ако претседателот не удри со тупаница по маса, би можеле да бидеме следната Украина.“

Свет | пред 7 месеци

Путин пристигна во Магадан, па продолжува кон Алјаска! Светот во очекување на историскиот самит меѓу рускиот лидер и Доналд Трамп

Рускиот претседател Владимир Путин пристигна во рускиот град Магадан на Далечниот Исток, пред средбата со американскиот претседател Доналд Трамп во Алјаска, јавува дописникот на РИА Новости.Според портпаролот на Кремљ, Дмитриј Песков, претседателот ќе изврши увид во јавните работи и индустриските објекти во регионот, а ќе разговара и со гувернерот Сергеј Носов.„Потоа ќе оди во Алјаска и ќе започне руско-американската агенда“, рече тој.Растојанието меѓу Магадан и Анкориџ е околу три илјади километри, а времето на летот помеѓу градовите е околу четири часа.Според портпаролот на Кремљ, Јуриј Ушаков, Путин и Трамп ќе се сретнат во Анкориџ во петок во 22:30 часот по московско време (23:30 часот по македонско време). Самитот ќе се одржи во воената база Елмендорф-Ричардсон. Политичарите прво ќе разговараат лице в лице, потоа со учество на делегации, а разговорите ќе продолжат на работен појадок.Централната тема на средбата ќе биде решавањето на украинската криза, а страните ќе разменат мислења и за соработката меѓу Москва и Вашингтон. Лидерите ќе разговараат за задачите за обезбедување мир и безбедност, како и за прашања од меѓународната и регионалната агенда.Не се очекува потпишување документи за време на состанокот. Лидерите ќе зборуваат за постигнатите договори на заедничка прес-конференција.Објавен е распоредот на ТрампБелата куќа го објави распоредот на патувањето на американскиот претседател Доналд Трамп во Алјаска, за средба со рускиот претседател Владимир Путин.Шефот на Белата куќа наводно пристигнува во Анкориџ во 06:45 часот (12:45 часот по македонско време).„Во 11:00 часот по локално време (21:00 часот по македонско време), Трамп ќе учествува во билатерална програма со претседателот на Руската Федерација во Анкориџ“, се наведува во документот.Според распоредот, Трамп ќе го напушти градот во 21:45 часот (03:45 часот по македонско време).Според портпаролот на Кремљ, Јуриј Ушаков, лидерите ќе ги започнат своите разговори во 21:30 часот по московско време (22:30 часот по македонско време).Руската делегација ги вклучува министерот за надворешни работи Сергеј Лавров, помошникот на претседателот Јуриј Ушаков, министерот за одбрана Андреј Белошов, министерот за финансии Антон Силуанов и специјалниот претседателски претставник за инвестиции и надворешно-економска соработка Кирил Дмитриев.Централна тема на самитот Путин–Трамп ќе биде решавањето на украинската криза, но ќе се дискутираат и други теми. „Секако, ќе бидат опфатени пошироки задачи за обезбедување мир и безбедност, како и актуелни и најакутни меѓународни и регионални прашања“, нагласи Ушаков.Лидерите ќе разговараат и за билатералната соработка во економската сфера: „Забележувам дека оваа соработка има огромен, и за жал, досега неискористен потенцијал“.Сè уште не е јасно дали ќе се одржи заедничка прес-конференција, но сигурно е дека лидерите на двете земји ќе се обратат на печатот.Историска средба во Алјаска – Русите слетааПрвиот руски владин авион Ил-96, кој полета од московскиот аеродром Внуково, слета во Анкориџ, според податоците на Flightradar. Според руските медиуми, можно е во него да се наоѓа група што се подготвува за самитот меѓу рускиот и американскиот претседател Владимир Путин и Доналд Трамп.Втор авион со 52 руски новинари полета од Москва синоќа во 17:30 часот. Новинарите на аеродромот ги пречека Ил-96, во кој се наоѓаше рускиот министер за надворешни работи Сергеј Лавров. Меѓу патниците е и рускиот амбасадор во САД, Александар Дарчиев, кој тивко спомена дека се вратил од одмор.Новинарите ќе бидат сместени на стадионот „Сали“ во Анкориџ.Средбата меѓу рускиот и американскиот претседател Владимир Путин и Доналд Трамп во Алјаска ќе започне во 21:30 часот по московско време (22:30 часот по македонско време) со средба еден на еден, на која, освен лидерите, ќе учествуваат само преведувачи, изјави на брифинг помошникот на рускиот претседател Јуриј Ушаков. Двајцата претседатели ќе ги продолжат разговорите на работен појадок.

Свет | пред 7 месеци

Трамп и Путин во Алјаска – различни цели, заедничка сцена

Денешниот самит меѓу американскиот претседател Доналд Трамп и рускиот лидер Владимир Путин во Анкориџ, Алјаска, ќе ги седне двајцата на маса со спротивставени приоритети, но и со заедничка желба за меѓународно внимание.За Путин, самото одржување на средбата е победа – признавање дека обидите на Западот да го изолираат не успеале. Алјаска е внимателно избрана локација: без прелетување над „непријателски“ земји, далеку од Украина и Европа, со историска симболика за менување граници. Рускиот лидер инсистира на задржување на сите освоени територии во четири украински региони, иако Киев тоа го смета за неприфатливо.За Трамп, кој уште во кампањата ветуваше дека „ќе го заврши војната за неколку дена“, средбата е шанса да ја игра улогата на глобален миротворец – и можеби да се доближи до Нобелова награда за мир. Сепак, неговите изјави се колебливи: од нарекување на разговорите „слушателна сесија“ до оптимистички најави дека и Путин и Зеленски сакаат мир.Украина и европските сојузници стравуваат од можен „land-swap“ договор – територијални концесии во замена за прекин на огнот. За Путин, тоа би значело дипломатска победа; за Трамп – историски момент за кој ќе може да тврди дека донел мир. Но дали Киев би прифатил такво нешто останува неизвесно.„Мислев дека ова ќе биде најлесната војна за решавање“, призна Трамп во Овалната соба ден пред патувањето. „Излезе дека е најтешката.“

Свет | пред 7 месеци

Трамп: Верувам дека Путин и Зеленски можат да постигнат мир

Американскиот претседател Доналд Трамп изјави дека верува оти рускиот претседател Владимир Путин и украинскиот лидер Володимир Зеленски можат да постигнат договор за мир, додавајќи дека утрешниот негов состанок со Путин во Алјаска е „голем и важен“ и би можел да спаси многу животи.Одговарајќи на новинарско прашање дали е подготвен да му понуди на Путин пристап до ретки минерали во замена за прекин на војната, Трамп рече дека утрешната средба е само прв чекор, а уште поважен би бил потенцијалниот втор состанок на кој би присуствувале и Путин, Зеленски, тој самиот и, можеби, европски лидери.„Ќе видиме дали можат да се договорат“, изјави Трамп, нагласувајќи дека состаноците не треба да се гледаат како „награда“ за агресорите. Тој повторно истакна дека војната никогаш немаше да започне доколку тој останеше на функцијата во 2020 година.Трамп посочи дека неговата цел во Алјаска е да постави темели за можен директен дијалог меѓу Путин и Зеленски. По изјавите, делот со прашања и одговори беше прекинат, а новинарите беа замолени да го напуштат Овалниот кабинет.

Свет | пред 7 месеци